維羅納平手盤冇甩「拖」

猪拉多纳

意甲今晚有場獨腳戲，由維羅納主場迎戰拖連奴。維羅納今季主場表現可靠，12場贏出8場嘅戰績甚至仲好過費倫天拿同國際米蘭等前列球隊。而且佢哋已經捱過「魔鬼賽程」，依家成班波做好搶分準備，足智彩今仗開平手盤，梗係撐1.8倍嘅主隊。

（TVB301台周二凌晨3:45直播）
拖連奴防線唔掂

或者喺見到維羅納近5戰贏得1場時，會對佢哋有啲戒心，但睇番佢哋近期嘅對手有拿玻里、羅馬同祖雲達斯等「硬嘢」，失分情有可原。況且呢班波上仗主場對「斑馬兵團」，喺落後兩球劣勢之下都可以追和，睇得出班人鬥心十足，加埋射手東尼連續兩場建功狀態唔錯，今仗肯定把握機會重回勝軌。

對手拖連奴近兩場喺領先優勢之下失分，上仗主場更意外輸畀博洛尼亞，防線表現未能令人信服。至弊係佢哋近戰主要靠射手恩莫比尼數胡，偏偏佢個拍檔阿利斯奧施斯賽前傳出有傷未必踢得，作客更加難惡得出樣！