全歐最強鋒力大駁火

猪拉多纳

曼城主場挑戰巴塞

今晚歐聯16強首回合爆發矚目對決，英超「土豪」曼城坐鎮主場迎戰西甲一哥巴塞隆拿，雙方不嬲都好大喜「攻」，亦係至今其中兩隊士哥破百嘅豪門，佢哋鋒線把把尖刀張張利，為爭出線必定火力全開，預料會合演一場入球「大」騷。

（有線61、64、201及203台周三凌晨3時45分直播）
兩軍今季加埋入228球

巴塞一向主攻，今季於各項賽事累積射入111球，齋計聯賽都入69球，不過曼城仲癲，「藍月亮」夾埋共轟入117粒，係今季歐洲最強火力球隊，今仗名副其實係全歐士哥王PK戰。曼城領隊比歷連尼曾豪言贏波要贏得漂亮，經過佢悉心改造後，「藍月亮」擺脫前任文仙尼嘅保守球風，不但有技術細膩嘅大衞施華、拿斯尼、祖維迪作地面組織，速度飛快嘅翼鋒捷西斯拿華斯頻頻落底，全面發揮中鋒尼格度及迪斯高嘅搶點特性，高拉洛夫同耶耶托尼又係罰球專家，進攻瓣數多到得人驚。

另一邊廂巴塞主帥馬天奴提倡減少控球，變相令阿歷斯山齊士（A山）同柏度洛迪古斯有更多打反擊嘅空間，凸顯二人嘅速度優勢。由於美斯今季傷患不斷，馬帥亦因時制宜，呢位球王近期墮後一格多做策應，助攻數字急增，造就佢、A山、柏度仔、尼馬、法比加斯等個個都交出入球雙位數，進攻潛力全力開發，將美斯倚賴症減到最低，加上尼馬傷愈復出且狀態甚弗，今仗隨時再做秘密武器。
矮仔防線難頂高空轟炸

不過，巴塞控球少咗略為縮後打反擊，變相令後防更受壓，一對中堅佩奧爾及碧基無復當年勇，馬斯巴查太幼嫩，兩閘丹尼爾及佐迪艾巴攻強守弱，最重要係防線只得碧基較頂得，面對尼格度、高柏尼、耶耶托尼輪流高空轟炸，好難頂住唔失。

況且「藍月亮」首回合有地利，「黑山小妖」祖維迪及時回勇，甚至傳出王牌射手阿古路及悍將費蘭甸奴已可復出，主場一定搶攻以佔先機，當然巴塞亦會全力爭取作客入球，鬥攻格局必捧大盤。
耶耶托尼(曼城中場)

攻守兼備嘅全能戰士，既能作為防線前嘅屏障，亦係曼城轉守為攻嘅發電機，後上入楔尤其煞食，連射罰球都有一手，令佢今季取得15個士哥，今仗倒戈必會施展渾身解數，證明巴塞當初放棄佢係冇眼光。
阿歷斯山齊士(巴塞隆拿前鋒)

「智利C朗」深得主帥馬天奴器重，尤其係巴塞多踢反擊後，充分發揮出其速度優勢，並洗脫上季「不射帝」嘅惡名，於各項比賽轟入17粒，仲貢獻咗9個助攻，信心爆棚弗到震，勢必成為曼城後防心腹大患。
歐聯密碼

0:巴塞近5次作客英格蘭球隊未嘗一勝

1:美斯喺英國只於2011年溫布萊決賽入過1球

2:曼城4次主場對西班牙球隊，獲2勝2和不敗

3:雙方6次於熱身賽交手，巴塞3勝1和2負

6:曼城今屆6場分組賽全開大