曼城主場真正最強

猪拉多纳

喪入117球！鋒力冠歐洲！

萬眾期待，歐聯16強重開！踏入淘汰賽階段，場場都係重量級大戰。今晚雙響炮曼城對巴塞隆拿同利華古遜對巴黎聖日耳門，唔使問，球迷焦點都落晒喺曼城撼巴塞身上啦！雖然曼城踢歐聯嘅經驗有排都追唔上「地上最強」，但佢哋擁有全歐洲最強嘅火力，最重要係有個無敵主場，絕對有能力令巴塞暴露防線不穩嘅弱點，一於直取2.8倍主勝！

（有線61、64、201及203、中央5台周三凌晨3:45直播）

曼城對上兩季都葬身喺分組賽嘅死亡之組，所以都唔可以怪班粉絲懷疑佢哋唔識踢歐洲賽。今屆「藍月亮」喺分組賽6戰5勝，同衞冕嘅拜仁慕尼黑同分出線，已經叫班質疑佢哋嘅人收晒聲，亦都幫班球員打定支強心針入16強。
費蘭甸奴復操踢得

今屆曼城先踢主場，唔想喺次回合作客魯營陷於苦戰嘅話，今晚點都要搏甩髀攞番啲甜頭先得嘅！

曼城今季入球去到117球，係歐洲火力最強隊伍，查實佢哋陣中有尼格度、捷西斯拿華斯、大衞施華等西班牙腳，對一班巴塞兵自然唔會陌生，中場靈魂耶耶托尼更加係倒戈相向，佢攻守兼備嘅踢法，正正剋住巴塞冇正規防中嘅弱點。

仲有，拿斯尼上場一復出就即刻有波入，仲獲《曼徹斯特晚報》大讚佢令「施華仔」威力加倍，即使依家阿古路有傷唔掂，但係費蘭甸奴都已經復操，隨時可以落場搏殺，要攻破巴塞大門唔係太難啫！
巴塞防線唔穩陣

尋日晏晝1點鐘抵達曼市嘅巴塞，今季換上馬天奴執教，成績尚算不過不失，但就冇咗以往哥迪奧拿同維蘭路華教嗰陣嘅霸氣囉！佩奧爾年紀漸大傷病多，碧基自從同咗夏奇拉一齊之後就不停跌watt，令「地上最強」近4仗都有失波，加埋美斯同尼馬今季都傷病纏身，表現唔穩定，未必頂得住曼城喇。
曼城球場

座位：47,728

成立年份：1880
本土賽

聯賽冠軍：3

英格蘭足總盃：5

英格蘭聯賽盃：2

社區盾：4
洲際

歐洲盃賽冠軍盃：1
Data King曼城對鬥牛兵有優「細」

‧「藍月亮」歷來歐聯主場鬥西班牙球隊錄2勝2和。

‧巴塞今屆歐聯作客3戰僅獲1勝（1:0擊敗些路迪）。

‧曼城連開4口半場細。
頂占筍盤：曼城（主勝）