攻守超班瓣瓣掂 PSG射爆利華

猪拉多纳

歐聯16強今晚殺到埋身！德甲「阿二」利華古遜會喺主場進行首回合賽事，迎戰法甲豪門巴黎聖日耳門，利華今仗雖有主場之利，但係近況並唔理想，加埋佢哋上仗分組賽即使面對褪色曼聯，仍然大敗0:5收場，相信今晚難以抵擋由伊巴謙莫域帶領嘅PSG，「張峰」決定冷敲4.2倍「讓客」！

（有線62及202周三凌晨3:45直播）

利華古遜分組賽唔算惡踢，以次名出線實屬正路，但係喺分組賽兩遇今季戰績極差嘅曼聯均被大炒，主場更係吞足5蛋，證明整體實力始終同歐洲一線有段距離。
「恐怖月份」7戰5負

此外，利華近況亦唔算太好，繼喺德盃畀乙組嘅凱沙羅頓淘汰後，上仗喺聯賽主場迎戰爭逐歐聯分組賽入場券嘅主要對手史浩克04，亦都以1:2落敗，加埋後防主力史柏希斯喺該仗傷咗肌肉，今晚可能要由中場悉尼森姆頂上，唔怪得德國傳媒形容近7戰聯賽輸足5場嘅佢哋，正係身處喺「恐怖月份」，接連失利更令全隊信心大受打擊，情況絕對唔樂觀。
卡雲尼打柴未驚過

聖日耳門目前喺法甲位居榜首，有5分領先優勢，加上人腳充裕，首回合作客實力次一班嘅利華，一定會排出最強陣容，務求盡快拉開距離穩陣晉級。雖然烏拉圭箭頭卡雲尼因大腿有傷倦勤，但腳風甚順嘅伊巴謙莫域近4仗入4球，今仗無論夥拍拿維斯定文尼斯，前線火力都足以摧毀對手嘅防線。

況且，由巴西國腳堤亞高施華所領導嘅後防，喺法甲25戰只係失咗16球，同里爾並列聯賽最強防線，「張峰」相信無論攻同守都超強嘅PSG，今晚將會輕取利華。
Data King伊巴謙歐聯腳風順

‧聖日耳門今季18場作客賽事只得1場冇波入。

‧聖日耳門射手伊巴謙莫域6場分組賽獨取8球。

‧連同德甲及歐聯賽事，利華古遜今季14戰主場只得3場保持不失。
乜都玩錦囊 PSG搶韁博「第一隊入球」

聖日耳門喺歐聯分組賽慣性搶韁，6場有5場成功先拔頭籌，其中3場作客更全部開出「第一隊入球」，加上瑞典神箭伊巴謙莫域繼續擔正數胡，進攻火力有晒保證，一於再追1.77倍「第一隊入球」。