FC多倫多細盤有機

猪拉多纳

三線星級戰將未齊腳

新一季美職將喺3月初開鑼，各隊正積極備戰，弱旅FC多倫多將會喺中立場同哥倫布機員踢熱身賽，雖然FC多倫多今季積極增兵，簽入多位海外球星，誓要一洗「魚腩」之名，但磨合需時，而且今場始終都係熱身賽，呢兩支東岸球隊都未上力，阿King建議揀入球細好啲。

（周四凌晨2時開賽）

FC多倫多上季喺東西岸總排名尾三，係名副其實嘅魚腩，好彩呢隊波都知個「醜」字點寫，喺新季大肆擴軍，希望取得創會7年來嘅首個季後賽資格，球隊分別從熱刺同羅馬簽入英格蘭前鋒迪科爾及美國中場米高巴特利，同埋從英冠嘅昆士柏流浪借入巴西鋼門祖利奧施薩，真係前中後都有球星。

不過「羅馬非一日建成」，呢班新兵都冇可能咁快融入球隊發揮作用，而且前線理應係最具威脅嘅迪科爾要去到月尾先正式成為球隊一員，FC多倫多攻力肯定唔夠，加上呢場只係一場熱身賽，顧名思義係畀未上力嘅球員熱吓身、操弗狀態，入波又點會多呢？哥倫布機員更有中場核心費迪歷高希古恩剛剛病愈，即使落得場都狀態不足，影響進攻，今場睇嚟細盤有望。
森林李城「大」廝殺

另外，英冠獨腳戲，諾定咸森林主場對李斯特城，森林主場攻力好勁，聯賽連續五場主場均入兩球或以上，李斯特城上場對住防守不俗嘅屈福特都入到兩球，可見攻力亦唔曳，大盤可取。至於剛喺英足盃越級挑戰成功，擊敗森林嘅英甲錫菲聯要作客另一支英甲球隊基寧咸，錫菲聯雖然睇落勢頭唔錯，但今場作客兼讓波略嫌過多，捧基寧咸下盤好過。