廠仔 拜仁德國兵「大」激鬥

猪拉多纳

歐聯16強激戰今晚上演德國兵內訌！阿仙奴喺首回合會主場迎戰德國班霸拜仁慕尼黑，兩隊同樣都有咁多德國兵，雖然拜仁今季表現好到有啲「屈機」，但阿仙奴戰力亦提升不少，既然雙方攻擊力都有番咁上下，當然捧1.65倍入球大，等睇好波啦！

（有線61、64、201及203、中央5台周四凌晨3:45直播）
張伯倫大勇玩速度

阿仙奴鬥拜仁呢個16強對碰正正係上屆翻版，「張峰」仲記得當時阿仙奴主場大演入球騷但以1:3落敗，埋下出局伏線，就算次回合作客淨勝兩粒都無濟於事，今屆佢哋唔想歷史重演，今晚當然要打醒十二分精神。

雖然阿仙奴喺2月惡戰連場，好彩佢哋反彈得夠快，大敗1:5於利記腳下、再主場悶和曼聯0:0後，上周足總盃終於2:1鍊贏利記復仇成功，打番支強心針！受負面新聞困擾嘅前鋒基奧特有冇得出仲係未知數，不過近4仗攻入3球嘅阿歷士張伯倫狀態大勇，上仗對紅軍更交出1個入波1次助攻，成為贏波功臣，相信佢嘅速度會為拜仁條防線帶嚟一定威脅。
拜仁對英超兵例失波

拜仁今季喺德甲以19勝2和、攻入57球嘅超強戰績領導群雄，前線人才濟濟嘅佢哋，無論用文迪蘇傑、洛賓定湯馬士梅拿，火力都有保證。另一殺手馬里奧葛斯亦有唔錯數胡能力，佢上仗休戰後今場弗爆上陣，大有機會重演去屆喺酋長球場入3粒嘅好夢。防守方面，雖然拜仁今季聯賽只失咗9球，不過值得一提嘅係，佢哋近兩季喺歐洲賽對英超球隊均未能保持清白之身，今次再對阿仙奴，就最利開大啦！
Data King 廠仔主場輸「德」多

‧拜仁近11場歐聯賽事，其中10戰每場最少入2球。

‧以2.5球中位數計算，拜仁近9場歐聯8次開大。

‧阿仙奴近3次歐聯主場迎戰德國球隊全敗，分別不敵多蒙特、史浩克及拜仁。
乜都玩錦囊 拜仁上仗留晒力客W抵捧

拜仁上輪德甲輕鬆大勝，教頭哥迪奧拿收起唔少主將留力，相反阿仙奴喺足總盃惡鬥利物浦後，距離今場大戰休息時間少對手成日，相信呢支德甲班霸有望重溫上屆好夢，再喺酋長球場贏波而回，1.65倍客勝抵玩。