普耶親民令新特蘭反彈

猪拉多纳

話說今年一月時新特蘭邀請我去佢哋球會參觀，咁我當然好開心咁坐咗18小時飛機去咗新特蘭，由佢哋嘅足球外展總監Robinson安排咗三日行程畀我。呢三日我見識到佢哋球會訓練場地嘅規模同科學化，而且仲跟領隊普耶見面，亦問咗唔少佢哋球會喺迪肯尼奧同普耶帶領下嘅分別。可惜係呢排我做咗燈神，唔覺意害佢哋喺主場輸畀維拉。

據我了解，普耶同前主帥迪肯尼奧最大分別係性格，迪帥係一個好激情嘅人，而且亦好有主見同控制欲，佢甚至要求球會餐廳膳食都要跟佢意思，而且認為球員同軍人一樣，要有絕對服從。結果大部分球員頂唔順，最後搞到佢離開球會由普耶頂上。
阿仙奴鬥黑貓睇高一線

雖然同普耶接觸好短時間，但睇得出佢係位風趣有禮嘅主帥，同每位助教關係都好好，佢哋每次練習同比賽前後都會一齊食飯。我相信領隊同球員間嘅關係有改善，係下半季新特蘭反彈主因。今周「黑貓」新特蘭要作客阿仙奴，後者早前因中路防守問題慘敗畀利物浦，幾日後喺足總盃再次碰頭時已大有改善，可見領隊雲格好識得對症下藥。其實兩邊我都好欣賞，不過我呢場都係睇好阿仙奴。

（now 622周六晚11時直播）