薩爾斯堡+1打老虎

猪拉多纳

歐霸盃32強首回合賽事今晚開打，Alwin先同大家講荷甲霸主阿積士主場迎戰奧甲霸主薩爾斯堡，個人認為目前嘅薩爾斯堡係奧地利足球史上最強球隊，有資格挑戰荷甲勁旅並喺今屆歐霸盃走得更遠，今場作客都唔怕阿積士，推介讓球客勝。

（周五凌晨4時05分開賽）

呢場冇直播嘅賽事其實係一場水準甚高大戰，阿積士喺歐聯出局其實有啲唔抵，佢哋分組賽同巴塞隆拿、AC米蘭兩強同組，最終壓過些路迪攞小組第三降格歐霸，但佢哋只少AC米蘭一分，最後一輪仲全場壓住米蘭強攻，最終和0比0飲恨出局，但亦睇到球隊把握能力奇差嘅問題。呢班波自法蘭迪保亞接手後一直稱霸荷蘭，球隊青訓系統一直為全球學習對象，不過我認為法蘭迪保亞過分倚重年輕球員，球隊年齡結構唔夠成熟，嚟到歐洲賽事點都輸蝕。
砌低拜仁唔怕阿積士

薩爾斯堡近年喺贊助商紅牛注資下不斷擴軍，今季終於到咗收成期，目前喺本土聯賽已經拋離次席嘅哥迪17分，重奪聯賽錦標只係時間問題，佢哋被譽為奧地利史上最強隊伍，前線由前巴西U20射手艾倫、斯洛文尼亞國腳中場小妖甘比爾、塞內加爾國腳中場沙迪奧文尼及隊長西班牙前鋒蘇里安奴組成嘅攻擊群威力驚人，單計呢四位球員，今季至今已合共轟入54球，聯賽嘅安枕無憂，令佢哋一早將目標鎖定歐霸盃，分組賽面對艾斯堡，艾夫斯堡同標準列治，就以全勝姿態輕鬆出線。呢班波歇冬期曾經喺熱身賽3比0大勝歐聯盟主拜仁慕尼黑，雖然唔係正式賽事，但能夠打到拜仁無還手之力，確實令人刮目相看，今晚蓄銳作客阿積士，一樣有條件打老虎。
Alwin 推介：

薩爾斯堡讓球勝

4★

祖雲達斯讓球勝

4★

魯賓卡山讓球勝

3★