拉莫斯報仇迪尼普拔「刺」

猪拉多纳

所謂仇人見面分外眼紅，前熱刺主帥桑迪拉莫斯喺08年幫球隊勇奪英格蘭聯賽盃冠軍，點知球隊不念功勞，之後一季因開季甩轆就極速炒人，令呢位西班牙教練勁冇癮。依家拉莫斯正正係迪尼普主帥，今晚歐霸盃32強首回合主場鬥熱刺，梗係要向對手還以顏色，受讓一球下，1.46倍「讓主」咪嫌熱。

（有線61及201周五凌晨2:00直播）

拉莫斯喺06同07年連續兩屆幫西維爾捧走歐洲足協盃冠軍（歐霸盃前身），其後受邀加盟熱刺，首季即攞到聯賽盃冠軍，領軍實力有目共睹。賽前佢喪插熱刺喺第二季受唔住誘惑，季初高價放走主力前鋒羅比堅尼同貝碧托夫，搞到開季8戰得2分，自己仲做埋代罪羔羊被炒！今次碰頭佢梗係要復仇喇。
舒活暗示熱刺留力聯賽

雖然迪尼普近兩個月冇正式賽事，但佢哋密密安排熱身賽操Fit自己，對手包括莫斯科中央陸軍、魯賓卡山等歐洲賽常客，比賽狀態冇想像中咁差。而且迪尼普仲阻止星級翼鋒高路比恩卡轉會利物浦，配合曾經喺英超搵過食嘅射手卡連歷，有一定數胡能力。

熱刺主帥舒活缺少指揮歐洲賽經驗，臨場應變能力難予人信心，加上球隊長途跋涉飛去烏克蘭比賽，難免影響狀態。賽前舒活又暗示會留力應付周日作客諾域治嘅比賽，今場留力下試問仲點讓波？