史浩克主場大「斯」殺

猪拉多纳

今晚德甲上演一場獨腳戲，由兩支喺歇冬後表現神勇嘅球隊對碰，史浩克04主場迎戰緬恩斯。緬恩斯作客賽事一向冇悶場，撞正史浩克04今仗有中場達斯拿復出增添火力，唔使問咁多，一於揀1.6倍入球大。（有線61及201、廣東體育周六凌晨3:30直播）
緬恩斯作客多波入

雖然話史浩克04下周中要喺歐聯主場惡鬥皇馬，但係球隊喺歇冬後連贏4場氣勢甚強，相信教練贊斯基拿都唔會刻意留力，費事輸波打擊球隊信心。射手亨特拉爾復出後經已開齋，不過佢仲未喺主場「士哥」，相信佢今晚肯定會加倍努力。球隊賽前亦傳出好消息，中場達斯拿養傷兩個月後回歸，有呢位能傳擅射嘅中場幫手，使驚史浩克冇波入？

話緬恩斯嘅作客比賽娛樂性十足真係冇講錯，佢哋喺今季10場聯賽作客賽事入面，當中9仗同對手齊齊炮製3個入球或以上。另外前鋒岡崎慎司作客特別醒神，近5場作客賽事攻入6球，配合球隊未試過喺客場保持清白身嘅防線，入球大仲唔係首選？