漢堡換帥偷多蒙特雞

猪拉多纳

從未降班嘅漢堡正處球會歷史最艱難時刻，監事會終於決定壯士斷臂，寧願多畀300萬歐元解約金，解僱上任只有四個半月嘅失敗教頭雲馬維克，今仗係新帥史隆卡上任第一擊，主場面對有歐聯後顧嘅多蒙特，戰意當然贏晒客軍，Oliver建議博有2.95倍好分頭嘅漢堡讓球主勝。

（有線61及201台周六晚10時30分直播）
五萬球迷道別辭世老臣

連輸7場聯賽嘅漢堡遇上去屆歐聯亞軍多蒙特，要避免再輸一場難度當然唔低，不過史隆卡的確可以為球隊帶嚟正面嘅態度，佢叫球員忘記過去六個月發生嘅事，着眼喺自身質素同球隊未來，佢堅信漢堡球員有足夠能力自救。今日漢堡主場球迷除咗為球隊未來吶喊助威外，亦準備向剛剛與世長辭嘅一代物理治療師靴文列加送別，呢位72歲老人家曾為漢堡服務咗27年，曾經係世上其中一位最知名嘅物理治療師，直至2005年至榮休。今晚會有五萬球迷高呼佢嘅名字，漢堡球員當然會搏晒命，希望用一場勝仗向佢道別，並力爭保留德甲席位，以慰佢在天之靈。

多蒙特實力同狀態都在漢堡之上，不過球隊仍然受傷兵問題困擾，球隊踢完今仗即要遠征俄羅斯，準備三日後對辛尼特嘅歐聯大戰，基於聯賽已爭冠無望，以球隊質素，要後上爭番第二亦難度唔高，呢一刻當然會將注意力集中喺歐聯，剛傷愈嘅馬高列奧斯同曉姆斯狀態都未足，今晚當然唔肯去盡，避免再添傷兵。當然，若果多蒙特喺早段取得入球，佢哋有能力大炒漢堡，但假如陷於苦戰，到後段時間戰意將會決定一切，漢堡分分鐘偷到雞。
Oliver 推介：

漢堡讓球勝

3★

史特加平手盤

3★

雲達不來梅讓球勝

3★（周日）