愛華頓傷鋒守細波抗車仔

猪拉多纳

今晚英超早場爆發「雙藍會」，由車路士主場硬撼愛華頓。榜首嘅「藍戰士」係今季英超唯一主場不敗之師，照睇牌面係高「拖肥糖」一皮，但考慮到莫連奴最鍾意玩輪換，適逢呢支倫敦球隊會喺下周中歐聯造訪加拉塔沙雷，「寸王」今晚有可能收起部分主力，對住大傷「鋒」嘅愛華頓梗係捧1.88倍細好路啦！

（now621台周六晚8:45直播）
莫連奴歐聯前例玩輪換

車路士將會喺下禮拜四凌晨嘅歐聯16強首回合造訪加拉塔沙雷，以莫連奴一貫嘅作風，今晚極可能會派林柏特、奧斯卡杜斯山度士同費蘭度托利斯等副選兵落場，論狀態同殺傷力就梗係唔及韋利安同尼曼查馬迪啦，但你唔好理，「寸王」嘅哲學就係最緊要贏波，攞到3分嘅話贏1:0同10:0佢都一樣Happy。
盧卡古養傷賴史密夫後備

最重要係泰利克服肌肉傷可以披甲，有呢位鐵血隊長頂替經常輕出嘅大衞雷斯擔正，「藍戰士」後防照計仲穩陣，況且佢哋上仗先喺足總盃吞完曼城兩蛋出局，班後防球員仲唔醒醒定定做番齣好戲咩，愛華頓想搵車路士着數？冇咁易！

之所以睇小愛華頓鋒力，皆因佢哋近4場聯賽只係入得3球咁大把，「新魔獸」盧卡古仲養緊傷固然係致命傷，最慘係賴史密夫啱啱先至腦震盪好番，領隊馬天尼斯好可能會安排佢先任後備，派遣拉仙拿查奧爾擔正。呢位生力軍上場足總盃鬥史雲斯係有波入，但全場表現查實好一般，亦唔係可以靠一己之力搵到食嗰種前鋒，加埋「拖肥糖」對上18次英超造訪車路士都未贏過，相信馬天尼斯會以1分戰術出動，唔慌會踢得進取，入球細唔捧點得呀？
Data King 莫連奴英超主場未輸過

車路士近6場有5仗開入球細。

愛華頓對上18次英超作客車路士未贏過（9和9負）。

莫連奴英超主場領軍未輸過，累積獲57勝16和成績。
乜都玩錦囊 馬天尼斯作客車仔全敗

愛華頓唔單止連續兩場英超作客賽事落敗，領隊馬天尼斯喺英超總共4次造訪車路士更加係輸晒，史丹福橋擺明唔旺佢，1.47倍車路士主勝趁熱食。