英超「雙城記」吼半和

猪拉多纳

弱雞火龍 Vs 冇牙老虎

卡迪夫城由曼聯名宿蘇斯克查掌舵後，表現同之前差唔多一樣咁水皮，啱啱仲喺足總盃16強輸畀英冠仔韋根出局添，今晚「弱雞火龍」嘅對手侯城亦唔好得幾多，呢隻「冇牙老虎」暫時只係距離降班區域3分，海軍鬥水兵，預計雙方半場都未必分到高低，Yennie推介1.9倍半場和！
卡城兩中場打柴

卡迪夫城喺足總盃出局，唯一好處就係可以專心踢好聯賽，全力爭護級，弊在佢哋最近輸波不特止，仲要輸埋人！中場悍將加利美度上場波傷出，賽後證實因為肌肉撕裂要抖幾個禮拜，呢單消息對「火龍」嚟講可以話係晴天霹靂，皆因佢哋本身已經有中場指揮官佐頓梅治養緊傷，可以預期卡迪夫城嘅中場組織能力會進一步削弱。

查實卡迪夫城對韋根場波佔盡優勢，上半場仲有成66%控球率添，奈何以韋費特沙夏同費沙甘保領銜嘅鋒線把握力欠奉，佢兩個速度係高呀，衰在一味只係衝衝衝，攻勢根本唔到肉，就算今晚主場出擊都唔慌有甜頭。
侯城作客少士哥

作客嘅侯城家陣排喺聯賽榜第13位，但查實只係比排尾二嘅卡迪夫城多5分，實力分野唔算太大。況且呢隻「冇牙老虎」今季13場客場比賽只得2勝2和9負，當中只係入得9球咁大把，鋒力真係弱到得人驚。再講，侯城下周二凌晨仲要喺足總盃第5圈重賽再戰白禮頓，賽程咁頻密，班球員勒住踢有乜出奇呀？所以今晚兩隊交手，莫講話半場吖，睇怕全場都未必有波入，一於穩陣啲，撐個半場和啦！