SAS無堅不摧 紅軍攻到你雲

猪拉多纳

呢排英超最Fit射手，梗係史杜列治啦！「史獨」近6場英超場場有波入，今晚由佢夥拍聯賽射手榜「一哥」蘇亞雷斯衝鋒陷陣，要喺主場撕破史雲斯防線易如反掌。況且利物浦啱啱喺足總盃出局一肚火，「新秀教頭」蒙克帶住隻攰爆「天鵝」造訪晏菲路絕對係死路一條，撐紅軍捧1.68倍「讓球主勝」啱數。

（now621台周日晚9:30直播）

利物浦上周中喺足總盃第5圈（16強）輸畀阿仙奴出局，有睇呢場波嘅朋友都知紅軍係輸得幾唔抵，不過正如隊長謝拉特話齋，球隊喺下半場嘅鬥心同比賽態度好正面，只要Keep住呢團火真係冇嘢可以擋到紅軍嘅強勢。從另一個角度睇，利物浦本身唔使兼顧歐洲賽，家陣喺足總盃又Out埋，專心一意聯賽搶分反而仲好。
格連莊臣傷愈候命

今季紅軍重新起飛，主因係「SAS」交足貨，蘇亞雷斯目前聯賽已經攻入23個士哥，史杜列治更加連續6場英超有波入，今晚睇怕又係佢兩位嘅Show Time。最重要係領隊羅渣士知驚，上場終於搵番丹尼爾艾格頂替甩漏多多嘅高路托尼擔正，加埋抖咗成個月嘅右閘格連莊臣已經克服足踝同鼠蹊傷患可以披甲，利物浦有前又有後，史雲斯想偷雞都難！
史雲斯搏完歐霸攰爆

唔係話睇小史雲斯，佢哋自從由隊長蒙克擔任看守領隊後，表現已經有番起色。不過蒙克始終係「新秀教頭」，今晚同一手提攜佢嘅前「天鵝」主帥羅渣士合演「師徒對決」，論調兵遣將同臨場指揮功力肯定輸一大截。冇錯，史雲斯上禮拜五凌晨喺歐霸盃32強首回合逼和拿玻里係好叻豬，但亨格比利諗極都唔明，點解蒙克上場足總盃輸畀愛華頓場波要收起大批主力，佢唔係天真到覺得班波可以殺晒拿玻里同祖雲達斯等勁旅，捧走歐霸盃啩？

再講，史雲斯周中先搏完場歐霸盃，家陣又要急急腳造訪利物浦，球員體能已經輸蝕。況且米捷復出機會唔大，首席射手韋菲特邦尼又淨係識得喺自己地頭入波，今晚破唔破到蛋都成問題，造訪利物浦隨時輸鑊甘都似！
Data King：史雲斯入波少利記一半

‧史雲斯今季英超攻入33球，只係利物浦嘅一半（66球）。

‧「天鵝」首席射手韋菲特邦尼8個入波全部嚟自主場。

‧謝拉特今季透過死球為利物浦製造7個入波，數據冠絕英超。
乜都玩錦囊：首球冷敲史卡迪爾

史雲斯客場入率數字偏低，13戰只入得9球，加上佢哋只得25%傳球喺對手後半場，即係話一去到心臟地帶就亂晒龍，咁唔識攻，首球梗係揀利物浦球員啦！嫌史杜列治太熱嘅話，不妨考慮吓史卡迪爾，有謝拉特嘅靚絕死球傳送，呢位出名頭槌好嘅中堅話唔埋又有斬獲。