紐卡素迎維拉例煲魚生粥

猪拉多纳

「喜鵲」紐卡素近排士氣低迷，繼體育總監堅尼亞喺月初辭職後，領隊柏杜同班球員嘅關係亦急速惡化，今晚佢哋會喺主場迎戰阿士東維拉，好彩客軍狀態唔掂，Yennie認為主場出擊嘅「喜鵲」可以憑較佳質素小勝對手，冷吼3.4倍「讓和」！
紐記將帥不和恃質凌人

紐卡素上場聯賽淨吞熱刺4蛋，係球會自1987年以嚟，英超第一次錄得主場4連敗！其實「喜鵲」近排頻頻輸波嘅最大原因，係因為中場猛將卡比耶離隊，唔單止令組織力大減，仲引爆埋將帥不和嘅炸彈！其實都好難怪紐卡素班球員唔妥柏杜嘅，事關卡比耶一向都係「紐記」嘅中場領袖同士氣來源，又係法語系球星嘅大佬，家陣柏杜一句唔該將呢位法國國腳賣去巴黎聖日耳門，好兄弟鬆人，手足無晒心機同信心，成績自然一落千丈啦！

紐卡素家陣唯一嘅好消息，就係前鋒柏比斯施斯已經傷愈，今仗可以同新兵盧克迪莊合組雙箭頭，配合今季表現出色嘅翼鋒高法蘭復任正選，照計就算首席射手雷米坐波監，要憑高質撕破維拉防線，應該唔係咩難事。
維拉近8戰僅2場冇失波

另邊廂，客軍維拉上仗只能夠同卡迪夫城互交白卷，連魚腩都贏唔到，反映出維拉係幾咁水皮。維拉最大問題係防守唔穩陣，近8場比賽得2場保持清白身，當中總共失13球，就算艾邦拉荷同賓迪基做到嘢，入埋都唔夠後面輸啦！睇埋往績，紐卡素明顯佔優，但雙方近兩次交手，「喜鵲」都只係僅淨勝維拉2:1，既然咁好路，「讓和」又有分頭，當然值博啦！
Data King：紐記對賽未輸過

‧紐卡素聯賽主場迎戰維拉，連續7場未輸過。

‧紐卡素近8場聯賽有7場食白果。

‧賓迪基連續2次鬥紐卡素都有波入。