貝迪斯啃唔落畢爾包

猪拉多纳

西甲包尾大幡貝迪斯今晚將於主場迎戰畢爾包，受讓都冇着數。事關貝迪斯周中喺歐霸盃主場出擊，早早打開紀錄兼喺大部分時間人多蝦人少嘅情況下，都可以喺完場前被魯賓卡山憑12碼追平1:1完場，除咗睇得出呢班波實力普通外，士氣亦肯定受挫，今仗貝迪斯想重溫上月喺西班牙盃主場擊敗畢爾包嘅好夢非常困難，捧2.02倍客勝。

（now632台周一凌晨0:00直播）
降班膽主場冇威力

貝迪斯今季演出走晒樣，聯賽僅得14分，今輪西甲開始前，佢哋已落後尾4嘅馬拉加有成10分咁多，話佢哋係降班膽，一啲都唔過分。事實上，貝迪斯主場威力今非昔比，至今只得12分落袋，雖然前線孖寶佐治摩連拿同魯賓卡斯度都叫做交到貨，但弊在條防線實在太多漏洞，經常前面入埋唔夠後面輸，咁樣好難護到級囉。

對家畢爾包表面睇近4仗未嘗一勝，不過當中對手包括皇馬同馬體會，輸波算係非戰之罪，今晚對住貝迪斯，係重響勝鼓嘅好時機喇。講真，畢爾包踢法極具侵略性，攻擊點又多，包括阿度里斯等正選前鋒，至今已有超過5位球員貢獻4個入球或以上，值得一提嘅係中場伊拜高美斯，此子後上入楔同把握力上乘，仲斬獲8粒成為隊中神射手，今晚對住中門大開嘅主隊防線，又係搵食好時機。