利物浦專注英超仲着數

猪拉多纳

過去一星期嘅城中熱話，首推某知名時事評論節目主持遭電台無情解僱，坊間輿論傾向同情當事人，認為電台以「斬立決」嘅解僱方法有點粗暴。其實足球世界又何嘗唔係一樣，史雲斯前領隊米高盧特立同富咸前主帥梅倫史甸正正係近期活生生嘅例子，當中前者更曾為球會奪得史上首個重要錦標，正式有功有勞，但最終「天鵝」一封電郵通知就炒咗佢，並且欠缺足夠理據。盧特立落得如此下場，令人慨嘆足球世界嘅生態環境愈嚟愈唔健康。
米捷回歸史雲斯可返正軌

史雲斯呢兩年喺盧特立帶領下，摒棄咗過往粗枝大葉、硬橋硬馬嘅打法，變成以控球在腳、偏重地面進攻為主，比起傳統嘅中型班如維拉之流，觀賞價值更高，贏得唔少球迷口碑。可惜今季傷兵滿營，米捷、舒維爾及普素路等中前場好手先後受傷，令入球數字大幅下滑。一對中堅捷高同埋艾殊利威廉斯又唔擅應付高空波，面對高大中鋒便較吃虧。幸好「天鵝」主場成績尚算可靠，近兩輪全勝兼保持不失，米捷同舒維爾今晚相繼復出，對球隊前景會有正面作用。

「天鵝」今晚嘅對手利物浦就剛被英國傳媒評為最具觀賞價值嘅英超球隊，對球員嚟講絕對係一個嘉許，雖然「紅軍」上周日足總盃「贏形勢輸波」，但單線發展又焉知非福？反觀史雲斯剛喺歐霸大戰一場，齋計體力已經輸蝕晒。