多蒙特上盤凍過水

猪拉多纳

殘陣作客辛尼特捱冷

歐聯16強首回合「雙特之戰」，俄羅斯辛尼特主場鬥德國多蒙特。上屆亞軍多蒙特已失去「神奇球隊」光環，更飽受傷兵問題打擊。殘陣之下，細鬼認為教練高普未必冒進，特別係俄羅斯天氣嚴寒，隨時影響球員發揮，最重要唔好輸等次回合返自己地頭仲有價講。多蒙特讓半一實在太過火，辛尼特人腳質素唔錯可坐和望贏，下盤可取。

（有線61及64台周三凌晨1時直播）

多蒙特傷兵一大籮，中後場大部分主將倦勤，除右閘巴拉斯塞高斯基、兩位中堅蘇保迪、曉姆斯、中場根度簡傷養外，防守中場施雲賓達亦喺上仗聯賽受重創長抖。高普現時只係以一條副選防線應戰，自然唔敢推得太前，應會採取穩策略，可能仲要中前場球員幫手回防都唔奇。屋漏偏逢連夜雨，射手羅拔利雲度夫斯基患上感冒缺席日前操練，去到攝氏接近零度嘅俄羅斯比賽，隨時令病情惡化。種種不利因素圍攻下，好難搵到理由支持多蒙特。
辛尼特星將有卡士

俄超現時仲係歇冬，辛尼特已有兩個月未踢過正式賽事，但球隊積極備戰，頻頻同具級數嘅球隊踢熱身賽，保持狀態。辛尼特憑雄厚財力，近年引入侯克、韋素等優質外援，加上「沙皇」艾沙維回巢後翻生，呢班波有相當競爭力，主場受讓半一，下盤的確吸引。
艾沙維鋪橋搭路更具威脅

08年協助辛尼特勇奪歐洲足協盃（歐霸盃前身）嘅艾沙維，轉投阿仙奴令事業陷入黑暗時期，喺上年返母會並獲重生。雖然呢位32歲老將高速個人突破減弱咗，但佢閱讀賽事能力仍屬首屈一指，艾沙維專心為隊友鋪橋搭路隨時更具威脅。
奧巴美揚入波停不了

外形酷似亨利嘅奧巴美揚今季加盟多蒙特後，搶咗羅拔利雲度夫斯基唔少風頭，呢位24歲加蓬國腳喺德甲已入咗13球，當中歇冬後近5仗轟入5球，無疑係多蒙特現時最銳利前鋒，佢嘅演出絕對喺「蜜蜂兵團」今仗能否取得作客入球關鍵。
歐聯密碼

1:辛特尼分組賽只得1勝，分組賽得6分係歐聯改制後出線16強嘅最低得分。

2:今次係辛尼特第2次入16強，上次辛尼特於11/12球季主場3比2擊敗賓菲加，但作客輸0比2，總比數輸3比4。

3:多蒙特上屆歐聯淘汰賽3場作客未贏過，當中有兩場冇入波。

5:辛尼特對上5場歐聯賽事均開出「半場和」。