歡笑多多換柏寶仲好

猪拉多纳

　　今晚部分場次真係亂過亂世佳人，唔好以為睇通睇透，可能危險經已在前面，譬如第三場，咪以為出馬9匹比較易中，大家仲記唔記得月初谷草頭場出馬6隻，大熱門可以三甲不保。呢個世界千奇百怪，馬場都係一樣，總之今晚要小心。

　　第六場四班1650米。「繽繽紛紛」愈嚟愈接近勝利邊緣，之前在呢項路程曾經力併僅負於「小林夜雨」，嗰場第三名「龍華太旨」不久之前都贏得到，冇理由佢四班唔掂啩。

　　「繽繽紛紛」今次唞番名本再跑，阿威轉用黎海榮，而唔用湯智傑，配搭顯露殺機。睇埋隔夜飛，獨贏7個開左右，唔冷亦唔熱，賠率似係真波，WP買得過。

　　第七場三班1650米。「喜勁駒」體質弱，又有腳患，咁耐以來，方仔好識得就住，往績上名多，跑得好差比例較少，已經係最有力證明。今次唞到夠先至復出，唔揀田草，肯回到谷中一哩，部署醒目，難得排到好位，續用潘頓，點會唔想執番場。

　　第八場三班1200米。「歡笑多多」算係李易達馬房之中，今季演出最穩定嘅馬之一，跑咗6場，只係得兩場冇表現，演出算係有交代。雖然話上次直路完全無力抵抗冠軍馬「萬事勇」嘅衝刺，佢攞個第二都幾篤定。

　　強敵不在陣

　　「歡笑多多」今次冇咗強敵「萬事勇」在陣，佢自然惡啲，加上，由韋達換上柏寶，發揮呢類馬仲好，而賠率反而由熱變冷，我認為更加抵買。

　　陳華棟 資深評馬人