莫帥以退為進能否得逞？

猪拉多纳

自從今季重返英超後，車路士主帥莫連奴一改以往寸爆作風，變得非常低調，就算球隊位列聯賽榜首，佢不斷示人以弱，強調曼城實力超晒班，車仔唔具備爭標條件，仲話今季處於重建階段，要捧盃？下季先喇！我覺得莫帥咁講非常精明，一來可以減壓，二來依家嘅形勢唔同晒，陣容亦非最強，好難做到當年一上任即擸兩盃，如果咁快就話要染指聯賽、歐聯錦標，到時衰咗咪孭晒鑊？
加拉塔沙雷絕非善類

儘管對外認低威，但莫帥私底下向球員傳達嘅訊息，係唔好諗得太遠，盡力踢好當下嘅比賽，估唔到莫帥連中國三十六計中嘅以退為進都識，不過呢招扮豬食老虎能否得逞，都要視乎對手係咪跌入其圈套，今夜歐聯16強首回合作客土耳其勁旅加拉塔沙雷，唔單止有佢兩位愛徒「魔獸」杜奧巴及史奈達壓陣，08年莫連奴接掌國際米蘭，正係代替奪冠後被炒、現為加軍教頭文仙尼，難得喺如此場合碰頭，仇人見面分外眼紅，文帥定必想趁機報仇證明自己，況且分組賽尾場加拉塔沙雷於雪戰中擊敗祖雲達斯，絕非善類，所以「寸王」要小心翼翼。
金句：莫連奴是否玩扮豬食老虎的遊戲？