法蘭克福細盤圖利

猪拉多纳

護級大過天唔慌去盡

歐霸盃32強次回合，德甲法蘭克福主場迎戰葡超波圖，法蘭克福首回合作客喺落後兩球劣勢下扳平，打成2比2不分勝負，但呢場激戰影響到兩軍之後聯賽演出，成績都未符理想，目前兩隊喺各自聯賽都去到重要關頭，今晚有顧慮下好難重演入球騷，Alwin建議捧1.85倍入球細。

（有線63台周五凌晨2時直播）

法蘭克福首回合作客波圖踢出無比鬥志，表現令人激賞，全隊上下本來對歐霸盃充滿熱誠，皆因今次係球會近20年來首次打入歐戰淘汰賽階段，但亦因首回合遠征苦戰回唔切氣，啱啱喺周日德甲主場失分，畀大部分時間踢少個嘅弱旅雲達不來梅守和。

法軍教練艾明費賽前講明擔心聯賽多啲，佢哋目前喺德甲以22分排13位，但只多尾二嘅弗賴堡4分，多尾三同尾四嘅漢堡同史特加3分，護級形勢咁緊，最攞命係未來四場德甲對手分別係史特加、漢堡、弗賴堡同紐倫堡，全部都係護級大戰，難免有後顧之憂，雖然歐霸盃出線形勢大好，但艾明費都唔想係硬碰史特加前搏殘。球會體育總監般奴胡拿賽前亦話，如果今晚踢成0比0而取得出線資格，佢會感到滿意。
波圖寧爭葡超亦有保留

另一邊廂，波圖首回合領先兩球下被追和當然洩氣，呢支近三屆葡超盟主，踢完首回合後聯賽再衰一鑊，主場對艾斯杜尼爆冷輸0比1，目前喺聯賽榜已經跌至第三，落後榜首宿敵賓菲加7分，佢哋嚟緊周末仲要喺葡超作客硬撼甘馬雷斯，到時再有閃失，聯賽唔使旨意衞冕，今晚亦好難全力出擊，雙方都有保留下，預計入球唔會多。