富咸塞車阻頭阻細

猪拉多纳

馬加夫人海戰術求1分

「魔鬼教頭」馬加夫今晚於倫敦打吡戰率領富咸主場挑戰車路士，馬加夫教波出名夠狠，為求搶分不擇手段，今次面對黃金戰「車」明知實力唔夠揪，以佢脾性極有可能擺個鐵桶陣，以1分為目標大踢醜陋足球，於中後場屯重兵，誓以人海戰術塞死車仔進攻路數，因此車路士今仗破關唔係易事，今場玩細盤最好！

（now 621周六晚11時直播）
操弗狀態穩住中路

馬加夫先小人、後君子，向粉絲講明依家係非常時期，每一戰都為搶分救命，而唔係取悅球迷。呢位德國名帥仲話就算降班都會留隊，提醒班兵唔好以為可以逃得出佢五指山。富咸今季兩度換帥，軍紀散漫，搵出名鐵腕嘅馬加夫返嚟撥亂反正係好事，而經過佢嘅招牌地獄式辣操後，預期班兵體能會有所提升，富咸呢班波真係冇乜過人之處，要喺強身上搶分就好靠狀態同鬥志，依家馬加夫及時谷番起隊波，主場砌車未必會一面倒大敗。

富咸目前排聯賽榜包尾，27戰失59球，防守力全英超最曳，馬加夫知道問題所在，上場對西布朗用番經驗豐富嘅軒治蘭特同希汀加扼守中路，防中就搵薛維爾搭柏加，總算穩住中路，今戰對住榜首嘅車仔，將會繼續屯重兵死守。富咸傷停問題不大，但車仔踏入2014年喺聯賽8戰只失2球，佢哋難望偷雞。
車仔慢熱夠贏就算

車路士周中喺歐聯作客土耳其搏得都幾盡，但大軍勝在後備力量強勁，就算輪換都可保持戰鬥力，獨忌班波踢得慢熱，尤其喺作客情況下成日滋滋油油，客W熱至1.32倍實在令人有戒心。車仔續有中場雲堅基爾長抖，守將大衞雷斯有傷未必踢得，其餘主力都可候命。不過，破密集都要時間同耐性，加上車仔為保元氣，相信贏到就算，唔會強求大炒，再睇番兩軍近8次交手7場開細，今場細盤走唔甩啦！