利雲特頂得住奧沙攻「細」

猪拉多纳

利雲特今晚西甲主場迎戰同屬中游分子嘅奧沙辛拿。論實力，今場只屬五五波，利雲特雖有主場優勢，但奧沙辛拿上周爆大冷，主場大炒爭標分子馬德里體育會3:0，信心士氣爆晒棚，誰勝誰負難以預料。既然雙方防守力有番咁上下，一於向1.5倍入球細埋手。

（開賽時間︰周日凌晨1:00）
對下游球隊75%開細

利雲特近4場取得1勝3和不敗成績，而且只失咗1球咁大把，一班防守球員好似大衞拿華路、雲查等交足貨應記一功。若非球隊中前場火力一般，4戰只能攻入2球，本應有更好成績。事實上，利雲特對住中下游球隊開出入球細比率高達75%，以佢哋守強攻弱表現，今仗大有機會連開5口入球細。

奧沙辛拿上周幫巴塞、皇馬打江山，主場擊敗馬體會，成功保持3仗不失球。上仗能夠令火力十足嘅馬體會捧蛋而回，足見後防有幾穩陣。雖然中場羅拔圖托利斯腳風甚順，近3仗入2球，但佢哋始終不擅作客，今晚未必保持到水準，計落都係入球細最抵玩。