告達理有料到

猪拉多纳

　　自從雷神停賽之後，潘頓發憤圖強，兩日連取4W，進一步穩固領先優勢，依家佢同雷神相差10場，點都安心少少，反而韋達就唔多爭氣，之前連中三元風光過後，粉絲們跟住嘔凸，呢兩期輸熱門輸到傻，贏得1隻「火紅人」，正式係贏粒糖輸間廠。講到尾，都係潘頓信得過，呢期雖然大部分坐騎係熱門，好似冇乜肉食，勝在肯搏肯砌，起碼買落去值回票價。

　　至於練馬師陣營，呢排列強比較靜，中游馬房就乘機郁手，好似苗禮德，啱啱4W刷新個人單日紀錄，所以，未來日子必需吼實個別倉口。

　　今晚邊個會繼苗廐後發威？最大可能會係告達理，出馬多達9匹，真係好少見大告會一次派咁多馬跑，仲唔係有啲嘢！

　　環保戰士1200米專家

　　當然啦，出咁多隻，場場買，好襟計，可能會得不償失，惟有挑出三兩匹攞嚟買過關。正頭正路，大告批馬之中，「環保戰士」一定要擸實，1200米路程專家賽績好，條件四正。另外，有兩匹隔晚賠率唔多尋常嘅「喜樂洋洋」及「鵬力洋洋」，都可以考慮。(Jack)