好利佳①檔惡晒

猪拉多纳

　　今晚跑9場，一班設有兩場，三班有3場，都係高班賽事，總勝過充斥低班混亂場合，度馬無從入手。不過，高班賽又未必係特別好賭，因為大家咁高咁大，實力好鬼接近，有咩依郁，賽果好容易開錯隔離。都係嗰句啦，平常心面對，咪沉迷。

　　第二場四班1200米。「喜逸」今季轉入吳定強馬房，只係跑過兩場，都係二月先至發生，之前等到咁耐至跑，腳患係最主要問題。難得依家跑得番，狀態應該會逐漸跑番好，而今次排到2檔，隻馬可以跟得前啲，好檔點會冇幫助。

　　但話得說回頭，「喜逸」目前42分係有啲尷尬，練馬師有權退一步海闊天空，點都好啦，總之，未來呢3場，實會有嘢睇。

　　第三場四班1000米。「好利佳」成日都好黑仔，外檔係都唔放過佢，好似冤氣鬼咁跟到佢實一實，終於今次唔再抽外檔，畀佢排番1次1檔！好肯定對發揮有極大幫忙，假假哋季初仲同緊「信眼光」及「滿貫豐采」交手，實力在此場可說是鶴立雞群。

　　第六場三班1800米。「凱倫之寶」上仗初上三班屈居第二，輸在田泰安唔夠醒目及功架不足，但僅以頸位見負，即係代表三班實有得贏。

　　凱倫之寶換人求穩

　　「凱倫之寶」呢次隔一排再出，阿成為求穩陣，都係換個潘頓上去，費事又有咩差池。同一時間，今仗潘頓其實有好多實力馬可以跑，例如「真慷慨」及「自由式」，佢都一一放棄，仲唔係全心全意搏命。(陳華棟 資深評馬人)