諾在其中：百贏萬歲試準出擊

不死鸟

唔少人都知冼毅力有少爺脾氣，之前亦因為脾氣差而發生唔少事故，記得今季有次冼毅力陣上騎姿唔規矩，結果跟受影響嘅魯柏軒發生爭執，最後大家都要為魯莽行為負責，冼毅力因此被罰停賽十六日。嗰次停賽已經罰得夠和味，點知冼毅力喺五月一日突然擅自離開馬場，搞到又要被罰停賽一個月，既然紀錄已經「花」晒，相信下季都好難再喺馬場見到佢。

曾於英國勝出二千米

　　講番今晚啲心水馬，第五場三班二千二百米用「百贏萬歲」做膽，呢匹馬喺香港跑過四仗，其中兩度喺田草千八米上名，試準長力後今次轉爭谷草跑二千二百米，估計已到出擊時候。睇番馬會資料，原來「百贏萬歲」曾喺英國贏過二千米，今次增程必仲啱跑之餘，佢喺三班上陣亦點都有啲着數，有力贏馬開齋。

　　配腳先揀「好著數」，前仗同程以頸位壓倒「經典再現」打開今季勝門，嗰場後追凌厲兼末段交出快時間，今次回配柏寶兼只負一二○磅，有力威脅同場任何對手。

　　「衝勁直前」上場千八米抽得大外檔，搞到出閘留至包尾，入直路先發力追趕，雖跑第五但追勢吸引，要拖。「錢程萬里」上仗走外叠冇遮擋大敗，賽績唔可以作準，既然前仗同程跑第三，要拖一票。

　　第八場一班一六五○米，小妹推介「鐵拳」做重心，上仗千四米輸條頸畀惡馬「鳥語花香」跑第二，擺到明依家評九十三分仲未盡﹔大前仗「鐵拳」跑同程，亦只係落後頭馬「秘密行動」半個馬位得第二，今次狀態仲弗過嗰次，三甲一席應該走唔甩。

　　「愛馬寶」最近兩仗跑谷草千二米均獲亞軍，明顯特擅跑窄場，未開齋馬要拖。「按得快」排得黃金一檔、「秘密行動」同程耍家，記得齊齊兼顧。