近14次交手11場不敗水手穩操「勝」券

猪拉多纳

今日下晝澳職有場獨腳戲，由排第5位嘅墨爾本勝利主場鬥第4位嘅中岸水手。勝利雖然坐擁主場之利，不過球隊連續兩場錄得大敗後士氣受挫，佢哋條紙紮防線仲要唔齊章，仲話要學人讓波添，咁梗係支持1.8倍「讓球客勝」啦！

（有線64及203周五下午4:30直播）
勝利防線穿窿

墨爾本勝利先喺亞冠盃作客廣州恒大領先兩球下反輸2:4，上場再畀墨爾本雄心痛宰4:0，咪話唔打擊球隊信心。而且佢哋係澳職失球最多嘅球隊，21仗共失咗36球，今仗雖然有守將柏保路干查拉斯復出，但其餘後衞尼高拉斯安素同利查唔踢得，另外尋日被澳洲隊徵召咗嘅守將米利根預料趕唔及上陣，進一步影響守力，實在難以睇好。

中岸水手經歷5連敗後上仗反勝FC悉尼2:1，總算為球隊止血，射手米歇爾杜基亦打破入球荒有助回復信心。睇番雙方近14次交手，當中11場水手都保持不敗身，今仗對住防線變動甚大嘅勝利，隨時憑反擊砌低對手都唔奇。