車仔熱刺開大片

猪拉多纳

鬥牛失意兵打翻身戰

巴西世盃6月殺到，兩大「鬥牛射手」費蘭度托利斯同蘇爾達杜最近都冇份入選西班牙大軍，唔盡快「騷哥利」取悅領隊迪保斯基嘅話，決賽周列車肯定Miss硬！今晚車路士喺英超主場出戰熱刺，合演倫敦打吡，費托同蘇爾達杜將各為其主打爭氣波，相信呢兩位失意軍人肯定大駁火，捧1.8倍入球大好路。

（now621台周日凌晨1:30直播）

西班牙鋒線人才濟濟，變節入籍嘅迪亞高哥斯達呢期當紅，當弗嘅就有尼格度同柏度洛迪古斯，仲未計已經Out咗嘅韋拿同洛蘭迪，你話費托同蘇爾達杜唔加多兩錢肉緊，點博到主帥迪保斯基歡心吖？西班牙剛啱喺熱身賽贏意大利場波，上述兩位英超「鬥牛射手」齊齊名落孫山，咁失威，相信今場波將會成為佢兩個嘅推動力。
費托 蘇爾達杜趕搭世盃列車

車路士家陣喺英超高踞榜首，領隊莫連奴賽前又插英超賽會亂咁編賽程，質問點解要將呢場原定禮拜日舉行嘅「倫敦打吡」推前一日踢，搞到陣中大批國腳應付完周中嘅國際賽之後，唔夠時間休息喎！查實「寸王」上仗鬥富咸之前已經埋怨過賽程安排唔合理，但最尾「藍戰士」咪又係大勝對手3:1，以佢哋嘅雄厚兵源，真係唔使擔心今晚會勒住勒住。

況且舒賀爾尼同夏薩特呢排Fit到爆，前者上輪聯賽鬥富咸連中三元，後者即使喺周中鬥科特迪瓦場波畀迪奧迪踩到砵都爛埋，依然話冇事可以喺今晚披甲，呢對大勇翼鋒夥拍費托合組攻擊鐵三角，有基爾獲加同費耶斯一對閘倦勤嘅熱刺都咪話唔牙煙。
舒賀爾尼 艾迪巴約傍住衝鋒陷陣

之不過咁，熱刺依家係英超作客成績最好嘅球隊，14戰錄得9勝2和僅3負，守將維頓漢賽前雄心壯志，強調若果要爭取來屆歐聯入場券嘅話，老虎蟹都要出盡渾身解數打破歷來26次英超作客「藍戰士」不勝宿命，鬥心Very Good喎！係，丹麥中場基斯甸艾歷臣因背傷極可能避戰，但係艾迪巴約踏入2014年已經轟入8球，近6場作客賽事更加喪入7球，同費托一樣要打爭氣波嘅蘇爾達杜亦喺上場聯賽打破長達兩個月嘅入球荒，雙方中前場都咁猛火，呢場「大」龍鳳實做得成啦。
Data King：熱刺作客揪唔贏車仔

‧雙方近26次喺史丹福橋交手，車路士錄得16勝10和保持不敗。

‧艾迪巴約近4次喺英超擔正鬥車路士，3場有「士哥」。

‧熱刺連開8口半場細。
乜都玩錦囊：22倍「客主」有路捉

兩隊近7次喺英超交鋒，雖然當中有5場波係由熱刺先拔頭籌，但就冇一場揪得贏車路士。既然熱刺對「藍戰士」例牌有頭威冇尾陣，不妨估佢哋領先後失分，博22倍「客主」。