自動導航施回馬槍

猪拉多纳

　　今日舉行三場泥地賽，驟眼睇各有穩陣馬膽，例如第三場「百威將領」、第四場「偉寶之星」和第七場「嫡愛」。惟賭博士發現，近期的泥地賽冷門四伏，不是熱頭冷腳，便是冷頭熱腳，總之經常有不明物體闖入三甲，就講對上一次的泥草混合賽日，當天也是跑三場泥地，三重彩一條五千幾，另外兩條逾七千，派彩頗和味。

　　得出結論，倘大家對上述三駒感興趣，又嫌賠率偏熱食之無味，不妨動動腦筋向同場冷馬埋手，萬一夾中三重彩或單T，咁就肥美咯！第三場推介「自動導航」，前仗跑泥地1650米爆18倍冷門告捷，剛戰續爭勝途，佳績當前之馬臨場居然有13倍，票數反映幕後早已食飽，最終僅得第九。今仗增程兼改由薛寶力操刀，賠率可期進一步冷落，但經剛戰退熱部署，提防隔紗施展回馬槍。

　　第七場冷馬首推「真誠真意」，近三仗俱不上名，今日更跑其盲門泥地賽，臨場必定乏人問津。但細心觀察，此駒近仗屢跑田草1400米，而事實上，賽績顯示其長力止於1200米，換言之敗績不可作準，求減分心意昭然若揭；如今小休一個月復出，這次幕後居然放棄跑谷草，並轉來泥地兼打王牌上陣，看來食指已動。(賭博士)