黑貓心情唔靚 侯城有計

猪拉多纳

英超今季下游競爭激烈，但去到呢個階段初步都睇到邊隊較為危險，卡迪夫城於蘇斯克查接手後冇乜起色，現時已被行內人士視為降班膽材，前景唔多樂觀。至於新特蘭接連於盃賽交出好表現，若果專心打聯賽，相信可以逃出生天。講番今次推介，侯城主場對新特蘭，主隊讓平半可揀上盤。

新特蘭今季打盃賽確係有一手，但經過上周聯賽盃決賽拚盡輸波後，士氣難免受損，而話咁快就要於足總盃作戰，恐怕班兵未必可以及時回復心情。侯城主場發揮穩定，護級壓力相對冇「黑貓」咁大，有條件去盡搏殺，讓平半合理，值得捧場。

(now 621及632周日晚10時直播)
維羅納唔赦帕爾馬

同日意甲賽事帕爾馬主場對維羅納，呢場睇好客隊。維羅納今季係意甲神奇球隊，季前冇乜人睇好呢班波可以位居前列，佢哋演出都算幾穩定，依家仲有機會爭奪歐洲賽席位，已經算係超額完成。帕爾馬近況係亦唔錯，只係今場讓到半一真係太多，兩隊屬同級球隊對決，大家咁高咁大，維羅納唔赦對手，受讓自然可稍稍秤先。

（周日晚10時開賽）