華倫等易手難頂畢爾包

猪拉多纳

傳王健林入場「睇辦」

今晚西甲華倫西亞主場迎戰畢爾包，「蝙蝠軍團」今季表現飄忽，目前排喺聯賽榜中游，高不成低不就，既然佢哋嚟緊周中有歐霸盃後顧，球會亦面臨易手，咁多嘢煩，倒不如捧火力唔錯嘅畢爾包，直取2.95倍客勝啦！

（now632台及TVB13周一凌晨4:00直播）
阿拉伯財團都想入股華倫

華倫西亞上周造訪弱旅華歷簡奴踢到患得患失，結果以0:1輸波，仲令8場不敗走勢告終，「蝙蝠軍團」今季嘅聯賽失球數字高達37球，就解釋到點解佢哋變成中游分子，對住侵略性強嘅畢爾包鋒線，情況並唔樂觀，加上4日後歐霸要作客保加利亞盧多格德斯，今晚大軍會用咩心態應戰，仍然係未知之數。仲有呀，「蝙蝠軍團」會長沙禾近排頻頻搵緊投資者，繼當地電台Cadena Ser指有阿拉伯財團想入股之外，盛傳會收購華倫西亞嘅中國富豪王健林今晚亦獲沙禾邀請入場睇波，球會前景充滿變數，球員心態或多或少受影響。

畢爾包今季無爭歐洲賽，但佢哋一心一意踢好聯賽反而令成績大躍進，只要保持水準，要爭取來屆歐聯入場券唔係冇機。前鋒阿度里斯上仗大演帽子戲法，加埋中場古柏治埋齋，輕輕鬆鬆大勝CF格蘭納達4:0，協助球隊取得2連勝。事實上，畢爾包今季嘅小組入楔戰術發揮理想，不時令對手疲於奔命，今晚有力喺華倫主場反客為主，全取3分o架！