北阿爾卑斯打吡岐阜受讓抵玩

猪拉多纳

今日日乙有場「北阿爾卑斯打吡」喎。唔知？唔奇！事關呢個叫法早兩日先至出現，實際係由FC岐阜主場對富山勝利啫，呢場「北方打吡」大家都半斤八両，岐阜主場受讓平半，個1.75倍下盤抵博。

（開賽時間：周日下午3:00）

點解有場咁嘅打吡？其實完全因為Japan Alps廣域觀光都市連携會議拉攏咗FC岐阜、富山勝利同松本山雅3支北方球隊，開辦咗一個2014年「Top of 北阿爾卑斯」活動，呢個Event係用呢3隊聯賽對賽戰績，決定邊隊係北方之王，雖然活動實際目的係帶動當地土產、觀光旅遊業，至叻嗰隊都係得個虛銜，但最起碼呢3隊之間就會形成更激烈嘅競爭。
富山全亞洲班底信唔過

講開唔知，恐怕大家對呢兩支日乙隊所知亦有限。先講主隊岐阜，好多香港球迷嘅印象，佢哋只係日乙班尾波，所以足智彩開岐阜主場受讓覺得好正常，其實今季佢哋變化好大，搵咗前國腳瑠偉（拿武士）揸旗不特止，仲簽埋川口能活、三都主呢啲過氣國腳，又由名古屋鯨魚借咗件巴西前鋒泰亞高漢歷基，同時羅致咗1米87哥倫比亞長人中鋒拿沙列，換咗成12個球員，已經升格變咗「J1昇格」嘅競爭者，雖則開幕戰贏日乙新丁讚岐3:1唔算得乜，但係就反映出呢班波嘅攻擊力Upgrade咗。

對手富山勝利一樣有變，新球員連提升上嚟嘅青年軍有成13個新兵，不過呢支全亞洲班底嘅球隊，新簽球員係得由京都來投嘅後衞秋本倫孝名氣大啲，至於中國U19國腳高准翼，除咗因為係大陸前國腳高仲勛個仔，引起中日媒體關注，實際仲未夠經驗鎮守後防，幫唔到乜嘢手。今場都係咪信往績喇，要受讓嘅主隊岐阜啦。