撐巨人殺手錫菲聯再下一城

猪拉多纳

喺今屆英格蘭足總盃先後越級淘汰英超富咸、阿士東維拉，同埋英冠諾定咸森林殺入8強嘅英甲錫菲聯，今晚主場迎戰嚟自英冠嘅查爾頓。呢支「巨人殺手」最近愈戰愈勇，有望再下一城闖入4強，2倍主勝諗得過。

（now621、632、633台周日晚8:00直播）

只要錫菲聯過埋呢關，佢哋就會成為自2001年嘅韋甘比後，另一支第3組別聯賽球隊殺入足總盃4強。班波依家鬥志十足，而且佢哋自從喺第4圈（32強）重賽淘汰富咸後連贏7場，當中更只失1球。難得主帥尼祖哥洛夫冇畀勝利衝昏頭腦，強調球隊想晉級就要繼續小心應戰。就算守將哈利馬古尼、巴福特繼續抖，但仲有泰利堅尼地、賓戴維斯頂上，射手基斯樸達喺足總盃又表現特醒，6戰入4球，相信贏波問題不大。
查爾頓近6場輸4場

查爾頓喺今屆足總盃未受過太大考驗，最多只係鬥過同屬英冠嘅哈特斯菲爾德同錫周三。論近況，佢哋最近6場輸4場表現麻麻，至慘係佢哋今仗同樣有後衞梳尼、里安卻特膝傷缺陣，計落有主場之利嘅錫菲聯可以秤先。