弗賴堡搶分唔赦小蜜蜂

猪拉多纳

今季德甲又係拜仁一枝獨秀，不如留意吓緊湊得多嘅護級爭逐好過，排尾2嘅弗賴堡依家同尾4嘅史特加同分，嚟緊搶得一分得一分，今晚弗賴堡主場迎戰多蒙特，牌面同近況都輸蝕，不過搶分決心肯定好過要分心歐聯同德國盃嘅「蜜蜂兵團」多多聲，今場一於扒冷博3.25倍讓球主勝啦！（有線61、201及中央5台周日晚10:30直播）

弗賴堡近5場聯賽未贏過，不過上仗作客打和哈化柏林嘅表現已經有起色，而且佢哋主場出擊向來有一定戰鬥力，近4場主場聯賽有2勝1和1負成績，強如利華古遜都喺佢哋主場輸波，而且弗賴堡今季打起咗後防新星馬菲亞斯真達，據聞連利物浦都想斟佢，依家梗係要騷吓身價啦！
多蒙特分心兼顧歐聯 德國盃

多蒙特CEO早前提出「拜仁摧毀論」，話拜仁不斷用錢收購對手主力，咁樣壟斷落去會令德甲滅亡，事實上今輪開始前多蒙特落後拜仁成廿分，早就扯白旗宣布投降，反而歐聯同德國盃都形勢大好，餘下球季擺到明要力爭兩大盃賽冠軍，佢哋對上一場作客聯賽無端端可以吞漢堡3蛋，今場失分又有幾奇先？
頂占筍盤：弗賴堡（讓球主勝）