皇馬劏利雲特反擊莫帥姿整論

猪拉多纳

自從10月底輸完畀巴塞隆拿之後，皇家馬德里已經連續28場未輸過，今晚喺西甲主場對住利雲特，繼續由「BBC」領銜鋒線，要贏波應該冇咩難度。適逢大軍啱啱畀莫連奴嘅「姿整論」激親，捉利雲特嚟出氣就最啱，皇馬讓到「-2」照捧1.52倍「讓主」。

（now632台周一凌晨2:00直播）

皇馬首循環造訪利雲特贏得都幾險，補時階段靠艾華路莫拉達同C朗入波，先至反勝對手3:2，吸取過上次嘅教訓，今晚「銀河艦隊」又點敢輕敵？
「BBC」入波唔曉停

咁啱早兩日車路士領隊莫連奴向皇馬開火，話班球星開波前掛住排隊照鏡，緊張形象多過緊張比賽，佢哋今場實搵利雲特出氣！卡斯拿斯尋日更還擊，話想喺歐聯8強同車仔碰頭，Gel靚個頭畀「寸王」睇佢哋睇得又踢得。查實皇馬球員踢得係人都知，淨係由賓施馬、加里夫巴利同C朗組成嘅「BBC」鋒線，最近無論球會同國家隊賽事都入波入唔停，真係幾戥利雲特防線擔心。

係，客軍近5仗保持不敗，但對手只係奧沙辛拿同華拉度列嗰啲二打六球隊，唔足以反映呢班波嘅狀態。況且利雲特撞正強隊就冇晒符，就講1月兩鬥巴塞嘅西盃，兩回合計利雲特失夠9粒，今仗造訪巴拿貝睇怕都係輸大鑊。