馬體會強攻得米

猪拉多纳

7冠豪門淪為紙老虎

歐聯16強次回合，西甲馬德里體育會主場鬥意甲ＡＣ米蘭。ＡＣ米蘭今季成績大跌Watt，昔日豪門霸氣盡失，堂堂7屆盟主淪為紙老虎。首回合佢哋喺主場優勢下被馬體會偷襲得手輸0比1，演出已成強弩之末，加上近年作客西甲球隊冇運行，想收復失地難度極高。馬體會領先一粒未安寢，為免夜長夢多，必乘主場之利繼續強攻，捧主隊淨勝兩球開出讓球主勝。

（有線62及202台周三凌晨3時45分直播）
ＡＣ弱勢逆轉難度高

ＡＣ米蘭首回合主場雖然輸0比1，但其實演出已算近期佳作，可惜多次射門唔係中楣就被對手門將化解，最不幸係喺完場前被迪亞高哥達斯頭槌建功輸0比1，今場一定要入波先至有價講。

ＡＣ目前喺意甲愈戰愈沉，聯賽榜已跌至第10位；再翻查紀錄，ＡＣ近年喺歐聯遇上西甲球隊成績差到冇朋友，首先，ＡＣ對上4次於兩回合淘汰賽遇上西甲球隊都係落敗一方，而且球隊最近4次於歐聯作客輸波，對手同樣來自西甲，所以今次要在作客情況下反勝晉級可以講係「不可能的任務」。
迪哥韋拿雙劍合璧

ＡＣ米蘭今仗續有蒙杜利禾停賽、本田圭佑又不符合上陣資格，就算前鋒巴洛迪利可以復出，狀態亦未必十足。相反馬體會上周末聯賽缺少停賽嘅迪亞高哥斯達，依然憑另一射手韋拿梅開二度，以2比0作客擊敗切爾達，今仗「迪哥」抖足掛帥，同韋拿雙劍合璧，攻擊力更加有保證。

馬體會近期表現較差嘅多數係作客場合，主場出擊依然有水準，況且佢哋依家只係領先一球優勢唔明顯，一旦先失守便要從頭嚟過，以球隊今季主場強勢，實無必要刻意打守勢波冒險，預計主隊一定會比首回合踢得進取，有力淨勝ＡＣ兩粒，昂然進身8強。
大戰Chit Chat

迪亞高哥斯達（馬體會前鋒）：參加歐聯係每名職業足球員嘅夢想，我同隊友都係一樣想法。上場我哋喺聖西路贏波，證明我哋有實力爭取好成績，不過我哋唔會放鬆，每場歐聯比賽，落到場都一定想贏。

泰拉拔（AC米蘭中場）：上場喺聖西路我哋應該贏兩球，輸波係欠運。對方係西甲前列實力當然勁，但歐聯係與別不同嘅賽事，首回合我哋已經證明有足夠實力控制戰局，喺馬德里我哋一樣做得到。
歐聯密碼

1.馬體會係16強中防守冧巴1球隊，7場比賽只失3球

3.馬體會於歐洲賽史上3次進行互射12碼全數落敗

4.AC對上4次於歐聯兩回合淘汰賽遇上西甲球隊均被淘汰

15.馬體會對上16次於主場出戰歐洲賽勝出15次