拜仁爆廠唔手軟

猪拉多纳

上屆受過教訓會醒定

歐聯16強次回合上演德英大戰，拜仁慕尼黑主場迎戰阿仙奴。拜仁首回合作客酋長球場已經取得2比0領先優勢，不過有過上屆首回合作客同樣領先兩球，返主場輸番兩粒驚險晉級嘅教訓，拜仁眾將今場必然醒醒定定，當0比0重新開始，球隊本身實力遠比阿仙奴平均，近期狀態巔峰，主場可以再炒焗攻嘅客軍，黑柴撐讓球主勝。

（有線61及64台周三凌晨3時45分直播）

拜仁首回合憑卻奧斯同湯馬士梅拿各入一粒取得領先優勢，雖然「兵工廠」有門將施捷斯尼被逐，但拜仁整體演出仍然凌駕對手，如今重返主場，形勢上當然更有利，何況球隊已經傷疲盡起，首回合養傷嘅國王列貝利已傷愈復出，仲喺上周末聯賽大炒禾夫斯堡一役入波慶祝回歸，人腳更整齊。
阿仙奴傷停唔齊腳

拜仁目前勇達巔峰，喺德甲簡直打橫行，保持16連勝同49場不敗，近三場聯賽都大炒對手，加埋入咗15球，球員對教練哥迪奧拿嘅統治式踢法更為熟習，哥帥亦對陣中球員特長有更深入了解，球隊踢法更多樣化，吸收上屆教訓，加埋阿仙奴領隊雲格賽前撥火，話拜仁實力不如皇馬，相信會令拜仁眾將有更強求勝欲望，就算領先咗都唔會留手。

阿仙奴近期狀態都唔曳，啱啱大炒愛華頓殺入英格蘭足總盃4強，不過呢班波本身水準飄忽，尤其作客演出更大打折扣，今屆歐聯吞過拿玻里兩蛋，近兩場作客聯賽先以1比5畀利物浦大炒，跟住對史篤城亦輸0比1，前線兩大得分主力奧斯爾同基奧特都畀不擅輪換嘅雲格用到殘，啱啱搏完足總盃未必回到氣，今仗仲有門將施捷斯尼停賽，韋舒亞，艾朗藍斯，蒙利爾同禾確特繼續養傷，人腳唔齊，再訪安聯球場好難重溫贏波舊夢，形勢上又要焗攻，注定要畀仁再炒一場。