勝負已分都有話題

猪拉多纳

美國人經常掛喺嘴邊嘅諺語「Catch 22」，意思係做又唔係，唔做又唔係，左諗又諗都唔知點算，陷入兩難局面。歐聯16強次回合就出現以上情形，除曼聯嘅賽事外，其餘所有首回合作客嘅強隊都取得甜頭，唔少球迷都覺得次回合賽事變到冇睇頭，仲睇唔睇波好，更有評述員指呢啲賽事唔知有咩好講。
施蒙尼施多夫爆「紅褲子」對決

Peter認為球迷們可以有選擇，但師傅教落評述員唔係睇波，任何賽事都有唔同嘅演繹方式，就算係勝負已分嘅賽事都可以有話題。今晚馬德里體育會主場對AC米蘭，係兩位「紅褲子」出身嘅教頭施多夫同施蒙尼嘅對決。AC今季成績一般，相反馬體會喺施蒙尼麾下以「蔗渣價錢踢出燒鵝味道」，以平價球員打出好成績，究竟兩個「紅褲子」教頭嘅對決，係咪真係施蒙尼叻啲呢？

另外，曼城會唔會3日內連失2盃？佢哋喺英足盃表現失準，連續兩屆都輸畀韋根，係咪真係咁邪呀？Peter就覺得係曼城球員唔夠「Killer Instinct」（心狠手辣），就算係面對弱旅都要充滿鬥心去爭取勝利，咁先唔會落得輸波收場。曼城聽晚對手係巴塞隆拿，巴塞啱啱喺聯賽0比1輸畀華拉度列，究竟係陷入低潮定示人以弱，真係不得而知。如果巴塞真係跌Watt，以曼城人腳真係未必死得，隨時上演翻身仗。
金句：「Catch 22」歐聯賽事睇唔睇好呢？