歐聯「雙巴」晉級冇難度

猪拉多纳

今晚兩場歐聯16強次回合，基本上都冇乜懸念。巴黎聖日耳門主場對利華古遜，由於前者已遙遙領先4粒，度士亦懷疑聖日耳門球員嘅爭勝決心，畢竟晉級機會高唱入雲，成季流流長點都要識得留放，無謂於例行公事中耗力太多，費事搞到伊巴謙莫域等主力受傷，相信主帥白蘭斯會派出多名副選進行輪換。
利華雙箭死晒火

正所謂人要面樹要皮，雖然利華古遜近況極曳，但作客去到巴黎都唔想輸多鋪，可惜射手傑斯寧歇冬後死晒火，連南韓前鋒孫弘民都冇貨交，就算面對hea住嚟踢嘅聖日耳門，亦冇贏波本錢，度士認為好大機會和氣收場。

(有線62及202台周四凌晨3時45分直播)

至於巴塞領先曼城2比0，今仗仲有主場之利，係人都知魯營球場草地面積偏大，易攻難守，曼城急於收復失地，但面對攻力強大嘅巴塞亦唔敢太冒進，令佢哋依家攻又死、守又唔掂，陷入兩難狀態，球員沒有清晰嘅指示下，隨時踢到患得患失，畀對手有機可乘，因此巴塞可再贏多場。

(有線61及201台周四凌晨3時45分直播)