恒大撲擊水手

猪拉多纳

衞冕軍虎嘯關東

亞冠盃G組擂台躉廣州恒大（馬會譯名：FC廣州）第二輪會作客日本老牌勁旅橫濱水手，衞冕嘅恒大近兩場展現後勁王本色，今次打住「虎嘯關東」口號出征，大有不勝無歸之勢。水手主帥樋口靖洋話要同恒大死過，若然亂咁谷前主攻盞死快啲，恒大贏晒卡士，小讓平半要上盤！

（now 671周三晚6時30分直播）

恒大新季踢咗三場正式比賽，頭場中超盃以全副選陣容出戰送個冠軍畀FC貴州，跟住喺亞冠盃首輪分組賽對墨爾本勝利半場輸兩粒，結果由意大利新兵迪亞文迪帶領大逆轉贏4比2。去到上場聯賽揭幕戰對FC河南，喺缺少穆里奇及艾傑臣等主將下，換邊後一踩油又贏三粒，近兩場下半場轟入七球，足見後勁超強。今次大軍征日製作「虎嘯關東」海報，寫明虎行千里必凱旋，夠晒霸氣！
水手焗攻死快啲

恒大箭頭穆里奇有傷在身未必踢得，教頭納比料會安排郜林拍住艾傑臣攻堅，亦可將迪亞文迪推前爭取士哥，攻力冇明顯受削。門神曾誠受傷休戰，替補門將李帥上場都好穩健，並無後顧之憂。

橫濱水手分組賽首戰大敗，主帥樋口靖洋亂晒龍，話依家已無退路，今場要博一鋪以全取三分為目標，講真，佢哋人腳點計都唔及恒大，亂咁搶攻輸波機會更高。