拿玻里盃賽鴻圖大計

猪拉多纳

今晚歐霸16強首回合上演歐聯級戲碼，由波圖於主場硬撼拿玻里。今屆喺歐聯分組賽豪取12分都黯然出局嘅拿玻里，係一支雄心勃勃嘅球隊，特別係季初斥巨資買入希古恩、荷西卡利祖、梅頓斯等優質球星，絕對唔想空手而回，今場對住演出跌Watt嘅波圖，受讓平半真係筍到爆。

（有線61及201台周五凌晨2時直播）

睇番拿玻里喺聯賽畀榜首祖雲達斯拋離17分，爭標機會可以話非常渺茫，主帥「肥賓」賓尼迪斯深明有盃落袋，就係對老闆迪羅倫迪斯嘅最好交代，佢哋先喺上月淘汰羅馬殺入意盃決賽，依家目標指定歐霸。「肥賓」一向係盃賽專家，上屆中途出山帶領同樣降格嘅車路士勇奪歐霸盃，對兩回合淘汰賽嘅玩法瞭若指掌，首回合作客一定大踢穩陣波，睇定先食。
波圖跌Watt亂晒龍

同拿玻里相比，萄葡牙班霸波圖喺今屆整體表現跌晒Watt，歐聯分組賽贏得1場咁大把，演出差強人意，上圈歐霸都只靠作客入球優惠擊退法蘭克福，喺聯賽更淪為三哥，於月頭仲炒咗主帥保羅方辛加，搵嚟二隊教頭路爾斯卡斯度頂住檔，軍心不穩之下，點讓得起實力勝一籌嘅拿玻里？筆者相信拿玻里今仗能穩中求勝，受讓平半可謂坐和望贏。