薩爾斯堡歐霸「小拜仁」

猪拉多纳

又到歐霸盃，又到歐陸連線，又係Alwin同大家推介薩爾斯堡嘅時間，呢隊波到呢一刻已超越晒奧地利足球史上嘅最高高度，潛力深不見底，今晚歐霸盃16強首回合作客瑞士班霸巴素利要讓波，證明佢哋嘅實力已經受到莊家重視，但Alwin依然相信佢哋可以喺首回合贏波，撐薩爾斯堡讓平半上盤。

（有線63台周五凌晨2時直播）
「教授教頭」蘭歷克做總監

記得上圈首回合薩爾斯堡作客對荷甲勁旅阿積士，Alwin已經全力推介呢隊波，結果佢哋一鳴驚人咁大勝3比0，最終兩回合合計贏6比1，輕鬆過程甚至超出咗Alwin估計。呢隊波既有財團「紅牛」經濟支持，又有全德國領導班子帶領，46歲教頭羅渣舒密特之前執教過德乙柏達邦，但最大名氣嘅係佢哋體育總監蘭歷克，呢位「教授教頭」之前曾經喺德甲球會史浩克04同賀芬咸取得成功，後來因病辭職，好番之後去咗奧地利，成為薩爾斯堡冒起嘅重要功臣。

薩爾斯堡上季奧甲聯賽屈居奧地利維也納之後僅得亞軍，今季大事擴軍後戰鬥力幾何級數提升，目前喺奧甲聯賽已經拋離次席嘅哥迪25分，近期聯賽用大量副選都大炒對手，已經將注意力集中喺歐霸盃身上，陣中猛將包括斯洛文尼亞國腳中場甘比爾、前巴西U20前鋒艾倫、塞內加爾國腳沙迪奧文尼同隊長西班牙箭頭蘇里安奴，呢班球星級數喺奧甲打橫行，佢哋歇冬期熱身賽大炒拜仁慕尼黑3比0，係我見過拜仁今季最狼狽一仗，結合埋佢哋贏阿積士嘅輕鬆程度，相信隨時係歐霸版嘅「小拜仁」，目前薩爾斯堡歐霸盃奪標賠率仲有11倍，喜歡以小博大嘅朋友可以捧番多少場。
巴素利最強射手缺陣

巴素利歐戰經驗遠比薩爾斯堡豐富，上屆歐霸盃八強踢走熱刺，去到四強至畀車路士淘汰出局，級數當然唔低，不過球隊近況麻麻之餘，陣中最強射手馬高史達拿又因傷缺陣，面對實力有幾高仲係個謎嘅薩爾斯堡，主場受讓都信唔過，今場宜捧客軍。
Alwin 推介

薩爾斯堡上盤

4★

西維爾大

3★

賓菲加下盤

2★