愛華頓攻「城」格殺勿論

猪拉多纳

要數英超有份爭下屆歐洲賽入場券嘅球隊，又點少得愛華頓？「拖肥糖」暫時排第7，雖落後第5位嘅熱刺5分，但就打少2場。領隊馬天尼斯講明下季要打歐洲賽，仲話唔會放棄挑戰歐聯資格添，今晚主場對住「作客蟲」卡迪夫城肯定格殺勿論，1.81倍「讓主」抵玩。

（now621台周六晚11:00直播）
卡迪夫城作客10戰不勝

馬天尼斯首季執教愛華頓大獲好評，主場威力強勁，13場聯賽贏出9場，對住富咸、諾域治呢啲護級球隊都輕鬆贏多過一粒。「拖肥糖」今仗前場齊章，由連續兩場建功嘅射手盧卡古掛帥，中場米拿拉斯、巴克里從旁支援，咪忘記佢哋仲有助攻力超強嘅右閘史密斯高文，呢位守將至今射入5球為英超後衞之最，今晚實行全方位轟炸「卡城」防線。

對手卡迪夫城上仗主場大勝富咸3:1止血，不過呢間威爾斯球會作客唔多掂，連續10場英超未贏過，其中8場仲要衰到要食白果，真係睇見都唔開胃，我敢估佢哋今晚去到葛迪遜公園球場再一次捧蛋而回。