紅鑽發窮惡折「箭」洩憤

猪拉多纳

下仗閉門作賽唔見2300萬

剛啱創造咗個日職歷史「第一」嘅浦和紅鑽─被罰下輪主場閉門作賽，今日作客廣島三箭哀兵出擊，極可能發窮惡，疲兵再戰嘅廣島讓平半靠唔住，建議博浦和1.88倍下盤。

（開賽時間：周六下午1:00）

「日職紅魔」浦和呢排煩到爆，上星期佢哋主場0:1輸畀鳥棲之外，仲有啲唔生性嘅Fans掛咗條「只限日本人」嘅橫額出嚟，明顯含有種族歧視意味，結果梗係畀人插到反轉，韓國媒體仲分析話班「紅鑽躉」，其實係針對李忠成呢啲在日韓裔人士。搞出個大頭佛，加埋浦和球迷以前又有搞事前科，結果尋日就畀日職聯賽會判罰下一輪主場對清水心跳要閉門作賽，出現咗J聯賽史上「初次無觀客（觀眾）試合」，創造一個唔光彩嘅「第一」。
粉絲種族歧視累死浦和

呢種排外主義同日本右傾抬頭不無關係，可以話係大環境促成，但係就人見人憎，連一啲紅鑽擁躉都話好過分。球會方面自然仲慶，事關罰一場閉門作賽，佢哋連門票、廣告、商品銷售唔見咗3億日圓（約2,300萬港元），由於2005年同三菱自動車工業解除包底合約後，佢哋要自給自足，整劑咁嘢入晒肉，赤赤痛呀。
14次訪廣島僅5負

罰都罰咗，浦和班人惟有收拾心情準備今日客戰廣島，佢哋當然要搏命打好波，希望洗底。事實上，浦和作客廣島不嬲唔曳，往績6勝3和5負絕對夠晒硬淨。而且佢哋嘅隨軍Fans多，近兩年客場對廣島都有近3萬人入座，當中大部分係「紅躉」，氣勢唔會太蝕，否則廣島今日就唔使送25,000塊紫色打氣牌出嚟，希望吸引多啲本土球迷入場抗衡啦。

最重要係，廣島近5日內飛咗14,000公里應付亞冠盃，浦和門將西川周作又係佢哋嘅舊將，清楚晒廣島嘅路數，三箭呢個時候對住發窮惡嘅浦和，真係冇乜着數。