皇馬分心盞獻「細」

猪拉多纳

迪馬利亞想博黃牌免撼巴塞？

西甲今晚有馬拉加主場迎戰皇家馬德里，聯賽殺入最後直路，唔止榜首，榜下游亦爭持激烈，排13位嘅馬拉加都要搶分護級，但皇馬同樣要爭冠軍喎，「張峰」相信皇馬全取3分唔係問題，但大勝有一定難度，既然入球中位數開到3.5球，捧1.68倍入球細啦！

（now632台周日凌晨3:00直播）
硬淨馬拉加少大敗

馬拉加3仗不敗近況唔錯，上周以兩球輕取奧沙辛拿，但同尾二嘅華歷簡奴仍只差3分，護級壓力唔細。以辛達告魯斯為首嘅鋒線今季發揮一般，對住爭標三雄更係食足咁多場白果，今晚皇馬來勢洶洶，斷估唔會冒險鬥攻，分分鐘大玩「鐵桶陣」。事實上佢哋近4場最多只失1粒，早前主場鬥馬體會亦僅負1球，作客皇馬亦只吞兩蛋，證明唔係咁易被炒。
皇馬踢完歐聯踢打吡

榜首嘅皇馬為咗爭標，戰意當然旺盛啦，佢哋上場對利雲特一開波就好似搶錢咁，話咁快憑C朗打開紀錄，最終大勝3:0。但佢哋下周有主場對巴塞嘅大戰，中間又有歐聯次回合對史浩克04嘅「例行公事」，賽程咁密，贏緊波拖慢嚟踢係人之常情。奇怪嘅係，中場迪馬利亞講到明話想喺呢場波去盡儲夠4張黃牌，等到對巴塞場打吡大戰要坐波監，搞到主帥安察洛堤O晒嘴，不過學似「天使」咁嘅球員，揀易打先嚟搏命真係唔多，相信今仗皇馬多數就住踢，贏都只係一粒起、兩粒止，入球細好路啦！