北倫敦打吡撐熱刺

猪拉多纳

阿仙奴成籮傷兵做觀眾

周日英超壓軸戲爆發北倫敦打吡，熱刺於主場激鬥同市死敵阿仙奴。阿仙奴踏入連續3仗客戰硬嘢嘅第2站，嚟緊仲要作客車路士，加上佢哋傷兵名單成匹布咁長，呢個魔鬼賽期都咪話唔甘，「客」死白鹿徑一啲都唔奇，正所謂仇人見面分外眼紅，態沉嘅熱刺仲唔趁你病攞你命、喺打吡戰踢番場爭氣波振軍心咩？有得受讓梗係揀讓球主勝。

（now 621周一凌晨零時直播）
魔鬼賽程硬食3連客

魔鬼賽程年年有，今年特別甘，阿仙奴繼2月主場連戰曼聯、利物浦同拜仁後，踏入3月仲恐怖，啱啱周中歐聯16強次回合出征德國1比1逼和拜仁，黯然出局之餘，眾將都搏得幾盡。今仗作客熱刺，之後再於史丹福橋硬撼車仔，「三連客」兼場場硬嘢，稍有差池就會失去爭標機會，心理壓力極大。雖然阿仙奴今季整體發揮唔錯，但佢哋作客先後輸過畀曼聯、拿玻里、曼城等實力分子，睇得出佢哋客場逢強冇必勝把握，況且仲有奧斯爾、韋舒亞、基蘭基比斯、耶耶辛洛高、禾確特、戴亞比等成籮傷兵，久休嘅艾朗藍斯亦未出得住，兵源方面實在捉襟見肘。

熱刺一向與阿仙奴勢成水火，上輪聯賽慘吞車仔4蛋，爭前4嘅歐聯入場券愈來愈渺茫，反令佢哋今仗冇晒心理包袱，可盡情撲擊死敵，上仗本來踢得好哋哋，之後中堅卡保奧被逐兼輸12碼，先至潰不成軍係咁送禮，雖然卡保奧打甩咗張紅牌，但今仗未必會派佢披甲，呢位法國守將論論盡盡，唔出佢反而仲好。
主場績靚誓打翻身仗

上周中歐霸16強首回合熱刺主場1比3不敵賓菲加，基本上翻盤無望，令士氣再度陷入谷底，不過物極必反，冇乜嘢比一場打吡戰勝仗更能振奮軍心，倒戈嘅艾迪巴約揚言呢類大戰，唔使點激勵都會自動波搏甩髀，仲話球隊上下都充滿信心，極希望一挫阿仙奴從谷底反彈。的確與阿仙奴相比，熱刺嘅傷情冇咁嚴重，睇番佢哋近年7次喺白鹿徑對住死敵，法定時間錄得4勝3和未輸過，可恰死傷兵滿營嘅兵工廠，仲有得受讓咪走雞啦！