雙紅會撐利記

猪拉多纳

曼聯畀「莫耶輸」教喎

常言道，三十年河東，三十年河西，今晚英超「雙紅會」，曼聯主場對利物浦，「紅魔鬼」今季換咗莫耶斯掌帥後成績大倒退，反之紅軍喺羅渣士帶領下成績大躍進，令紅軍廿年嚟首次喺奧脫福作賽被視為熱門球隊，今晚科娜都撐紅軍追打落水狗，打沉死敵，平手盤捧利物浦﹗

（now 621周日晚9時30分直播）

可能科娜仲未算係資深球迷，季前淨係預計莫耶斯接手曼聯後成績唔多唔少都會差咗，一定冇費格遜時代咁好，但就完全估唔到「莫耶輸」可以令一支冠軍球隊沉淪到連前四席位都爭唔到，原來由兩個唔同領隊帶領嘅原班人馬，成績、表現可以大不同，真係令我「大開眼界」﹗
莫帥「亂斬」 戰術大倒退

其實莫耶斯帶隊成績差都算，最弊係喺佢帶領下曼聯冇隊型、冇士氣，表現差勁，戰術淨係獨沽一味嘅「亂斬」，踢法去番上世紀70年代嘅兩翼側擊斬高波，真係聽到都悶呀，何況係睇住班球員一味斬、斬、斬嘅球迷？

利物浦領隊羅渣士首季帶紅軍成績都唔好o架，只係排第七，仲衰過依家嘅曼聯，但分別係紅軍喺羅帥帶領下表現愈嚟愈好，由唔識入波變成英超攻力數一數二嘅球隊，佢主張嘅「Tiki-Taka」踢法依家大行其道，唔似得莫耶斯仲用緊Out到爆嘅斬波戰術，而且佢唔會一成不變，喺「Tiki-Taka」內加以變化、改良，對住唔同球隊有唔同嘅針對性戰術，令紅軍成為最具娛樂性球隊，成績好之餘球迷又睇得開心，皆大歡喜！
史獨阿蘇過電 SAS勁掂

唔單止領隊嘅功力，球員之間嘅化學作用亦好重要，「紅魔鬼」嘅朗尼同尹佩斯，曾經以為佢哋會係一對令人聞風喪膽嘅前鋒組合，結果卻係貌合神離，兩人喺場上甚少有交流，喺上月對富咸一仗竟然只係作出6次互傳，做唔到1+1=2嘅效果，反而紅軍嘅SAS組合就能夠1+1大過2，蘇亞雷斯同史杜列治識得自己搵食之餘，兩人仲勁有默契，「史獨」日前接受訪問就話佢同「阿蘇」嘅合拍係天生嘅，第一日嚟到紅軍就已經同「阿蘇」過晒電，睇嚟今場又係佢哋嘅天下﹗

利物浦依家順風順水，傷兵剩番左閘荷西安歷基，差唔多可以Full team，雖然曼聯拿尼、查維亞靴南迪斯賽前已傷愈復操，但佢哋下周中要踢主場對奧林比亞高斯嘅歐聯生死戰，歐聯關乎龐大經濟利益，相信曼聯唔敢同錢作對，今仗或會就住踢，所以科娜都係揀順風嗰邊，平手盤要紅軍！
香川真司Shinji Kagawa

出生日期：17/3/1989

曾効力球會：大阪櫻花、多蒙特、曼聯

代表日本國家隊上陣54次，入17球
祖阿倫Joe Allen

出生日期：14/3/1990

曾効力球會：史雲斯、域斯咸、利物浦

代表威爾斯國家隊上陣16次，沒有入球