曼聯發惡o趙利記雙紅會演入球騷

猪拉多纳

「逆轉雙紅」今晚爆「大」戰！風水輪流轉，廿幾年嚟一直騎住死敵利物浦嘅曼聯今季驟然失色，短短一季間由英超冠軍變到只可爭逐歐霸盃入場券。反觀上季連歐洲賽都冇得踢嘅紅軍，居然排喺聯賽榜前列。不過小妹亦唔敢斷言紅軍去到奧脫福球場可全取3分，皆因佢哋今季有前冇後，紅魔對住死敵隨時發惡，既然勝負難料不如敲1.62倍入球大！

（now621台周日晚9:30直播）

小妹仲記得費格遜半年前喺自傳度話「利物浦要有多8個出色球員先可重返爭標行列」，又指謝拉特「並非最頂級球員」，唔知費Sir係咪畀比利嘅「烏鴉口」傳染咗呢，家陣紅軍真係有機會爭逐英超冠軍，謝拉特今季亦交出8個入球同9次助攻，力證寶刀未老。
利物浦近4戰例省3球

利物浦今季發威，除「神奇隊長」之外，當然要歸功修心養性後獻出24個聯賽入球、10次助攻嘅蘇亞雷斯，同埋取得18球5助攻嘅史杜列治，加埋活力十足嘅佐敦軒達臣，近4場聯賽每場至少省3粒，火力強勁。不過佢哋後防就問題多多，丹尼爾艾格復出後表現已不及之前水準，對住速度力量俱佳嘅朗尼好輸蝕，佢拍檔史卡迪爾又成日喺禁區「手多多」，今場面對經常有爭議判決嘅球證卡頓保唔係咁着數喎。
4次交手旺開大

曼聯今季走下坡係事實，後防唔掂失波唔奇，但前線亦有番咁上下，朗尼已連續兩場有波入，既然「雙紅」近4次喺英超碰頭有3次開大，今次當然捧佢哋再演入球騷啦！
Data King：紅軍近7戰6開大

‧利物浦近7戰有6場開出入球大，其中5場紅軍攻入至少3球。

‧利物浦近8場有6戰喺上半場取得領先。

‧曼聯近6戰有5場未能喺半場領先。
乜都玩錦囊：利記快入局冷敲半場勝

如果英超係單計上半場戰績，利物浦家陣會以62分排第1，證明紅軍今季極快入局，經常喺上半場領先。今場唔知會唔會有頭威冇尾陣，但相信造訪慢熱嘅曼聯，要喺半場領先唔難，3.2倍半場客勝值得一試。