熱刺Vs阿仙奴北倫敦「大」戰

猪拉多纳

防線穿窿搏命開「攻」

今晚英超接連爆發兩場大戰，除咗有曼聯迎戰利物浦嘅「雙紅會」，仲有喺歐洲賽齊齊失利嘅熱刺同阿仙奴，合演北倫敦打吡！今場波可以話係關乎兩軍前途嘅生死戰，事關失分的話，阿仙奴幾可肯定爭標夢碎、熱刺就來屆歐聯無望，正因為咁，主場嘅熱刺同到訪嘅阿仙奴，都應該會搏晒老命喪攻，入球騷勢必開得成，小妹推介1.8倍入球大！

「兵工廠」中場傷兵問題嚴重，先有韋舒亞休戰，奧斯爾又啱啱喺歐聯對拜仁嗰陣拉傷腿筋，預料要抖4個星期左右，「死神」艾朗藍斯康復進度又有阻滯，今晚都唔使預佢哋落場。
卡斯唐復操或披甲

不過大家咪因為咁就睇死阿仙奴冇晒炮台冇波入，事關由莫斯科斯巴達來投嘅卡斯唐終於復操，今晚隨時候命，雖然呢位31歲嘅瑞典中場從未為阿仙奴披甲，但係佢成名已久，技術一流，佢嘅踢法應該好啱「兵工廠」，即使佢冇貨交都好，阿仙奴陣中都仲有阿歷士張伯倫、普多斯基、基奧特、路斯基同阿迪達等攻擊好手支撐大局，佢哋喺近幾場比賽亦包辦大部分「士哥」，鋒力一樣靠得住。可惜，阿仙奴條防線始終唔太穩陣，比利時中堅華美倫同法國守將哥斯尼更堪稱「蝦碌孖寶」，點信得過呀？

對家熱刺亦一樣攻強守弱，又係比利時國腳嘅維頓漢，上場波就送咗份大禮畀車仔，大家見到佢，有乜法子唔買大先？況且熱剌近排戰績麻麻，上仗聯賽吞咗車仔4蛋，歐霸盃強陣出擊又輸埋畀賓菲加，領隊舒活即時警告班球員，如果表現唔好，下季就肯定冇得留低，睇怕以艾迪巴約為首嘅眾將，肯定搏命開「攻」！