降「摩」大師里昂今晚做嘢

猪拉多纳

法甲老牌勁旅里昂今季出閘脫腳，直到舊年11月先開始上力，依家終於追到上第5，唔想下季冇歐洲賽打，家陣真係場場都要搏命。今晚佢哋喺主場迎戰聯賽「二哥」摩納哥，客軍近年每次到訪例牌贏唔到，畀里昂恰死！考慮埋摩納哥依家個第二都坐得好穩，球員鬥心未必十足，平手盤捧1.82倍嘅里昂，應該冇衰。

（TVB 302周一凌晨0:00直播）
摩納哥只求第二冇鬥心

里昂目前以28戰得45分排第5位，落後可以踢歐霸盃嘅第4位聖伊天3分，當然仲有價講啦！

查實里昂班波近排狀態真係唔錯，連同盃賽在內累積10場不敗，單計法甲又係近13場只輸過1鋪，球員回復信心，重拾勁旅本色，今晚喺自己地頭，邊個敢睇小佢哋先！最重要一點，里昂原來近8次主場對住摩納哥係累積4勝4和，一鋪都未輸過，依家平手盤，簡直筍到震啦！

摩納哥呢邊，依家排第2，落後「一哥」巴黎聖日耳門8分，想追都怕且有心無力，第3位里爾又差佢哋7分，畀唔到太大壓力，球員鬥心麻麻都好正常，淨係睇佢哋近3場聯賽客戰只贏1鋪，真係信唔過囉。

冇錯，佢哋喺法卡奧長抖後，補入嘅貝碧托夫上仗都開埋齋，不過「Hea碧」又係出名踢波懶懶閒，打硬仗都係信唔過嗰隻，加上今仗佢哋仲有中場重心杜拿蘭停賽，就算有隊長艾比度復出，睇怕都冇本事贏波囉。